Indian cricket team chuan Twenty20 series khel tura lo pantu Austrailia chu T20 vawi thumnaah an hneh a. 2-1 in series an la.
Pathianni zanah T20 series a match thumna hi Hyderabad-ah khelh a ni a. India tan batsman rinrawl pahnih Suryakumar Yadav leh Virat Kohli ten run sawmruk chuang siam ve ve in India hi hnehna an chanpui a. Ball hmangin Axar Patel a che pawimawh leh hle.
India hian tunkar atangin T20I leh ODI series khel turin South Africa an mikhual lehnghal ang.
Sky-Kohli show
India in chak turin run 187 siam an ngai a. Over 3.4-ah an opener pahnih KL Rahul leh Rohit Sharma te wicket an chan nghal.
Tawnhriat nei tha tawh Kohli leh India rama batsman thiam leh hmuhnawm ber zing ami Suryakumar ‘sky’ Yadav te an ding a. Anni pahnihin an bat hmangin inkhel kaldan leh a boruak an thlak chiang.
Australia legspinner Adam Zampa lakah an ke chheh dik tak mai chu chhawrin run pawimawh an siam mawlh mawlh. Sky-a’n half century siam turin ball 29 chauh a mamawh a, ball 36 atang run 69 a siam a. Kohli-a’n ball 48 atang run 63 siamin Australia in India hrek hlawhtlin hram tum hle mahse ani vangin India tan a tawp khar a harsat loh phah.
India hian over 16 leh 19 inkarah four leh six runs vawikhat ve ve chauh vaw thei mahse Sky-Kohli partnership in Australia tan pawi a khawih zo tawh.
Player of the series a thlan Axar Patel-a’n Australia batsman tha Aaron Finch, Josh Inglis leh Matthew Wade te wicket a la a. Glen Maxwell a run out bawk.
Tun series-ah over 10 vawmin wicket 8 a lak laiin run 63 chauh a pe a. T20 series pum a 6.30 economy rate neiin India bowler rintlak ber a ni.
He inkhel bikah hian Yuzvendra Chahal chuan Steve Smith-a wicket la in over li atang run 22 chiah a pe ve thung.