India ram pum huap a infiamna khawmpui lian National Games vawi 36-na a Mizoram aiawh a kal turte chu Thawhtanni khan Sports minister Robert Romawia Royte chuan ama inah thlahna hun a hmang.
He hunah hian infiammite hmun hrang hrangah training camp an neih mek avangin team tin aiawhin coach te an kal a. Mizoram Olympic Association hotuten an telpui.
Gujarat a neih tur National Games vawi 36-na hi September ni 29 hian Ahmedabad-ah hawnna neih a ni dawn a. MOA Secretary General V.Lalzawmliana chu Mizoram Contingent Chief de Mission a ni a ni dawn ang.
Mizoram atangin sport discipline hrang pakua tel turin an tling a. Khel hmasa tur leh a hnu hnung an awm dawn avangin a khel hmasa tur team football, weightlifting, wrestling, archery te Opening Ceremony hmang tur hian ni vawiinah Aizawl an chhuahsan ang.
Gujarat khawpui hrang hrang paruk – Ahmedabad, Gandhinagar, Surat, Vadodara, Rajkot leh Bhavnagar te bakah Delhi-ah neih a ni dawn a ni. Mizo infiammite telna hi Ahmedabad, Gandhinagar leh Rajkot-ah te an khel ang.
Sports minister chuan sawrkarin infiammite hamthatna tur a theih ang tawkin a siam a, sports policy tha tak a nei tawh a, tunah Mizoram aiawha infiammite ten awmze nei zawk lawmman an dawn theih tur Incentive Cash Award Scheme pawh a pass thar. Hemi hre reng hian theihtawp chhuah turin kalkhawmte a chah.
National Games tel pha nih ringawt pawh hi a hlut avangin infiammite pawhin an phu angin an kal lam leh haw lam chu thlawhna ngei a an kal tur thu a sawi bawk.
Thawhtanni hian Mizoram Olympic Association hruaitute te an thukhawm nghal a. National Games kalna turte leh November thlaa Shillong a buatsaih tur 2nd North East Olympic Games chung chang an sawi ho nghal.
NE Olympic Games-ah hian Mizoram atangin sport discipline 18-ah infiammi 371 tirh turin thuthlukna an siam a, Mizoram Team Contigent Chief de Mission atan MOA Joint Secretary Joseph Thansanga an ruat nghal bawk.
National Games a tel tur sport discipline-te
Discipline Player Official
1.Archery(M) 4 2
2.Football (W) 20 4
3.Weightlifting(M) 3 1
4.Boxing((M&W) 5 2
5.Judo(M&W) 4 2
6.Athletics(Wild Card) (M) 2
7.Swimming (Wild Card)(M&W) 5 2
8.Wrestling(Wild Card) (M) 1 1
9.Wushu (Wild Card) (W) 1 1