Sorkar department 10 te chu nimin khan Chief Information Commissioner (CIC) Lalnunmawia Chuaungo-in kovin, an hnathawh leh hmalakna, mipui hriat tur chi te mipuiin awlsam zawka an hriat theihna tura an website-a dah ngei turin a hriattir nawn.
He hi RTI Act, 2005 section 4(1)(b)-in public authority/ sorkar department-te laka a phut a nih thu CIC chuan a sawi a. Hemi chungchangah hian vawiinah department dang 10 te pawh koh an ni.
Sorkar thuchhuahin a tarlan danin RTI Act, 2005 section 4(1)(b) chuan sorkar department te chu an website-ah RTI hmanga dil ngai lovin DAA leh SPIO te biak pawh theihna, department directory, scheme leh programme hrang hrang an kal- puite, act/rules/regulations hrang hrang department-in a tihchhuahte, department hnuaia beneficiary list te, department budget dawn dan leh mipui tana tangkai tur information te dah turin a phut a. Hei hi department tam takin an tihlawhtling tawh a, la tihlawhtlinglote chu CIC-in kovin a sawipui a ni.
Mizoram Information Commission chuan kumin January ni 19 khan hemi chungchanga thupek tichhuakin sorkar office hrang hrang a departmental appellate authority (DAA) leh state public information officer (SPIO) te chu ni 28.02.2022 aia tlai lovah an hmalaknate Secretary, MIC hnena thehlut turin a lo hriattir tawh a ni.