Lirthei tlan dan hi enzui deuh a ngaiin a lang
Hri leng vanga kan buaina leh kan insumtheihna zawng zawng a reh tan ta ni maiin a hriat a, mipui kan zalen leh ta hle. A lawmawm viau rualin, kan zalen sual ang tih hlauhawm tak a ni.
Mihring chhuak chu sawi loh, motor tlanchhuak thei apiang an tlanchhuak leh ta emaw tih tur khawpin lirthei a tam leh tawh a, khawpui chhung phei chu pui leh miah miah tawh tak a ni bawk. Hunpui boruakin min nuai chho a, mamawh leh chakkhai lama khawpui kal kan tam chho zel bawk nen, kan lirthei tlan dan tal hi chu enzui deuh a tha khawp mai.
Sorkar in tlan loh ni siam ve bawk mah se, a endik leh vilzui kawngah duh angin kan chak tawk lo niin a lang a, mahni tlan loh nia la tlan vawk vawk, phalna pek zinga tel si lo an la tam hle. Kan inngaidam zel dawn a nih phei chuan thupek awmze awm lo kan chhuah a ni leh mai ang tih hlauhawm tak a ni.
Lirthei tlanchhuak an tam viau avangin traffic jam kan tuar leh nasa a, nileng thaka tlansawt loh ni a tam ta hle. Damlo na zual phur lirthei tan pawha kal ngaihna eih awm lo khawpin kan kawngpui a zim bawk nen, kan lirthei tlan dan hi chu ennawn leh thuai atan a tha viau ang. Chuti a nih loh chuan kan inphun lungawi ang a, hmasawn lo zawng hian kan khawsa leh reng ang tih a hlauhawm hlel lo ve.
Sorkar hian lirthei tlan dan hi siamtha leh thuai thei se la, motor lian zawk tlan hun emaw talte hi siamremin, tlan loh nia phalna nei lo lirthei tlanchhuak endik kawngah hma thar la lehzual mawlh bawk teh se. Hri leng hi a la reh lo tih kan hriat thar pawh a tul awm e.