Canada khawchhak lama thil lai chhuaktu 39-te chu a chhunga an awm laiin an inkhai chhuahna a chhiat avangin an tang a, darkar 10 zet hnuah an chhuak thei hlauh.
Sudbury, Ontario-a Totten mine-ah hian Pathianni atang khan an tang.
Tumah hliam na an awm lem lo va, tui leh chaw pek theih an ni hlauh bawk.
Thawhtanni khan chhanchhuah hna thawh nghal niin leilawn hmangin a ding ngil at km 1 zet an lawn a ni.
Ontario Mine Rescue-a mine rescue officer Shawn Rideout chuan khura tangte hi an luh atanga an chhanchhuah thleng hi darkar 35 zet a tlin thu Toronto Star chanchinbu hnenah a sawi.
Leilawn an dah luh theiha an lawn chhuah theih chhung hi darkar 10 zet a ni a, metre 100 zelah chawlh an la a ni.
“An vaiin an him a, an dinhmun a ngaihtuahawm loh va, hliam tuar pawh an awm lo,” a ti.
Thil lai chhuaktute hi an chhungte nen pawh phone-in an be thei reng bawk niin a sawi.
An inkhai chhuahna thin, lift system hi Pathiannia lei vel an khai chhuahna bucket lian tak a tla keh chuan a kalkawng a dal tlat avangin a che thei lo.
Totten mine hi Brazilian firm Vale-in an enkawl niin thawktu mi 200 vel an awm a. Darsen, nickel leh thil hlu dang an laih chhuahna hmun a ni.