Vladimir Putin-a chuan Zirtawpni hian Ukraine ram chhunga hmun pali a mi chengte ngaihdan laa vote thlak hnuah an duh zawk nia sawiin an ram peng (annex) atan an pawm tiin hming a ziah hnan leh dawn ta.
Ukraine-a hmun palia chengte hnena ngaihdan lak, referendum hi Ukraine leh khawthlang ramte chuan nasa takin an dodal.
Russian-te thlawp thuneitute chuan ni nga chhung ngaihdan lakah hian mi tam zawk vein Russia ram peng nih hi an duh niin an sawi.
Vote-te hi khawchhak lama Luhansk leh Donetsk, chhim lama Zaporizhzhia leh Kherson-ah thlak a ni.
Russian president hian Zirtawpniah hian heng ram bungte hi an ram nia puangin Kremlin-ah thu a sawi ang.
Moscow-a Red Square-ah chuan hun hmanna hmun tur pawh buatsaih tawh niin billboard an tarah chuan heng region pali hi Russia ram bung a nih thu ziah a ni a, zan lamah a lawmna concert huaihawt tum a ni bawk.
Tun tuma hun an hman tur hi Russia-in kum 2014-a Crimea a luah tih a puan dan nen a inang dawn hle a, hemi tum pawh hian president-in dawhsan atangin thu a sawi.
An ram anga Crimea an chhal hi khawvel ram tam zawkin an pawmpui lo va. Putin-a hian pawnah thu a sawi dawn tih hi a la puang lo.
A thupuangtu, Dmitry Peskov erawh chuan, “Naktuk tlai dar 3:00 (India-a tlai dar 5:30)-ah Grand Kremlin Palace-a St George Hall-ah Russia ram bung tharte hi hming ziah hnan an ni dawn,” tiin Ningani khan a sawi a. Russian-ten an puih, khawchhak lama inlak hran tum pawla hruaitute pawhin an hmanpui a rinawm.
Russian president hian October 4 hian parliament-a rorelna in sang zawkah thu a sawi rin a ni bawk a, hei hi kum 70 a tlin hma ni thum a ni dawn a. Parliament pawh hian khawvel ram tam zawkin pawmpui lo mah se Russia-in ram dang hmun a luah chu a pawmpui a ni.
Mipui ngaihdan lakah hian a hranpaa thil kalpui a awm lo va, inthlan buaipuitute chu ralthuam keng sipai nen in tinah lutin an ngaihdan an la.
US chuan ngaihdan lak avang hian Russia chu a hrek dawn tih a puang tawh a, EU ramte pawhin an hrek chhawng riatna kalpuiin vote laknaa inhnamhnawih tu pawh hrek an tum bawk.
German Foreign Minister Annalena Baerbock chuan Ukraine ram chhunga awm, Russia-in a luah tum rama chengte zingah hian an in leh an hnathawhna hmunah kalin, thenkhat phei chu silai nena vauin an nawr niin Ningani khan a sawi a. “Hei hi inthlan dan zalen leh fair letling chiah a ni a. Muanna letling chiah a ni bawk,” a ti.
Ngaihdan an lakna hmuna chengte hi Ukraine-a cheng 15% lai an ni a, ni reilo te chauh hriattirna pek lawk an ni a. Russian sorkar chanchinbu chuan ralthuam kengte thawh chhuah chhan hi venhimna thil vang chauh a nih thu an sawi a; mahse, an chet dan chuan mi ngaihdan tihkawihsakna nasa nia sawi a ni ve thung.
“Tawngkaa chhan tur a ni a, sipaiten kan thil sawi chu chhinchhiahin an kalpui zel a ni,” tiin Enerhodar-a nu pakhat chuan a sawi.