Mizoram Pradesh Youth Congress Committee (MPYCC) chuan Aizawl khawpuiin tui harsatna nasa tak a tawh mek chungchangah Deputy Chief Minister Tawnluia, PHE Minister chu chhuanlam siam tawh loa ching fel vat turin an phut.
Ningani khan MPYCC hian PHE minister pisaah he an thil phutna lehkha an theh lut a ni.
An lehkhaah theh luhah chuan Aizawl khawpuiin tui harsatna a tawh apianga power supply mumal loh vang tih te, ruah tlak tlem vang leh khawl chhiat vang tiin PHED-in chhuanlam siamin mipuiah hmaiphih nan an hmang thin a. Tun tumah hi chuan hetiang taka Aizawl khawpuiin tui harsatna a tawk ta hi chhuanlam siam tawh loa rang taka ching fel ngei an phut thu an tar lang.
MPYCC-in MNF party-ten sorkarna an chelh hnu leh PHED a enkawl hnuah vawi tam tak tui harsatna an lo auchhuahpui tawh tiin, tun dinhmunah Mizoram khawpui ber Aizawl hian tui harsatna nasa tak a tawk leh ta hi, he harsatna hi a rang lama sukiang turin minister hi an phut tih tar langin, “Mipui harsatna au aw chhang thei lo khawpa i department chan i enkawl zo lo a nih chuan, i department chan PHED pawh hi mi dang kutah dah ngam turin kan phut bawk che,” an ti.
Lehkha thehluh chhan sawiin, “Aizawl khawpui bialtu MLA 11 laite hian Aizawl khawpui tui harsatna an auchhuahpui rin a nih laiin, thawm engmah an nei lo a, MLA 11-te hian an vei tawk lo a ni. Hei vang hian Congress |halai hian hma kan la a, kan bawhzui zel ang,” MPYCC President Dr. Lalmalsawma’n a ti.
Dr. Lalmalsawma chuan lehkha thehluhah hian New Market, Aizawl building thiah sak that loh chungchang tar lan tel a nih thu a sawi a. September 22, 2022-a New Market main building sak nana Letter of Acceptance sorkarin a pe hi lawmawm an tih thu leh a sakna pawisa chungchang bakah hmalakna kal zel hi an enzui zel dawn niin a sawi.