PC party thalaiin “Mizoram sorkarin New Market building sa vat rawh se” an ti a. Aizawla New market building kum 2020 a thiah tawh tun thlenga sakthat a la nih loh avanga chhungkaw thahnem tak eizawnna khaihlakte lainatawm an tih thu sawiin, “an chaw bel pal buaksaktu Mizoram sorkar kan dem” an ti.
New Market Joint Sumdawng Association (NMJSA) hruaitu ten an ei bar dapna hmunpui thiah tak, sa tha leh thuai tura Mizoram sorkar an ngen thinnate chu dawt hmangin Mizoram sorkar in a lo chhang thin niin PC thalai chuan an sawi a. Thil thalo zawk a thlen hmaa a rang thei ang bera New market building chu sa ngei turin Mizoram sorkar an phut thu an sawi.
Deputy Chief Minister Tawnluia’n December 2021-a New Market building sakna atana January 2022-ah tender koh a nih tur thu NMJSA hruaitute hnena a sawi pawh a tak ram hmuh tur a awm lo nia sawiin. Assembly session-ah March 2022-ah tender koh a nih tur thu a sawi pawh rintlak a ni leh chuang lo niin PC thalai chuan an sawi a. “Smart City CEO-in July 2022-ah tender koh a nih tur thu a sawi leh pawh engmahlo mai a ni” an ti.
PC thalai chuan “Deputy Chief Minister meuh leh sorkar officer lian in khua leh tui te harsatna sutkiansak aia an phurrit belhchhah zawnga an inlulin khum duh ta mai hi demawm kan tiin, an hna chanpual kengkawh zo lo leh thawk zui tlakah kan ngai lo” an ti a. “Deputy CM hian UDPA hi midang kutah hlan ngam se, Smart City CEO chanpual pawh hi midang kuta hlan turin Mizoram sorkar kan phut” an ti bawk.