Aizawl : Larsap Hari Babu Kambhampati-a’n Education-ah Serchhip district leh district dang pahnih ten tan an lak zual a ngai tih sawiin, “Mizoram pum ang pawhin tanlak a ngai hle a, PGI rating-ah Mizoram dinhmun siamthat a nih theih nan DEO ten headmaster te leh school head te zirtirna an pe tha hle tur a ni” a ti.
Nimin khan Larsap leh a nupui Jayasree Kambhampati ten Serchhip tlawhin, Larsap chuan district thuneitu te, deptt. hrang hrang hotute, hohhran hruaitute, NGO hruaitu, political party hotute leh MJA Serchhip member te a hran theuhin a kawm a. Zirna kawnga tan la turin Education deptt. hotute chu a chah a ni.
Larsap chuan “Sorkar hnathawk te, banker te, gas distributor leh mipui rawngbawlnaa mawhphurtute chu pro-active an ni tur a ni” a ti a. “Zawh kher ngai lovin mipui tana hamthatna an kuta awm te chu an lo hrilh zung zung zel tur a ni a, hei hi an mawhphurhna a ni” a ti.
Serchhip district chu district ralmuang ber nia a hriat thu Larsap chuan a sawi a. Kawng thenkhatah hm- alakna tha tak tak te hmuh tur awmin, national award for best panchayat te pawh Sialsir-in a lo dawng tawh tih sawiin, faina kawngah pawh Serchhip district chuan hma an la tha hle nia a hriat thu a sawi.
Project thenkhat thawh chhung a rei lutuk thin leh a thawh hun chhung pawhsei a ni fo chu thil fello tak a nih thu Larsap chuan a sawi a. Project then- khat thawh chhung rei lutukin project thar thawh tur awm thei te a dang thin tih sawiin, “mipui tana hmasawnna ruhrel tha tak tak tur te kan chan phah thei a ni” a ti.
Mizoram hmun hrang hranga mipui tam zawkin Central welfare scheme tha tak tak, cheng tlem te kum khat atana peka, cheng nuai tel hmuh theihna tur te an hre lo hle tih a hmuh thu pawh sawiin, pawi a tih thu leh hengah te hian zirtirna kalpui nasat zual sauh a tul thu a sawi a. “Banker te hian scheme tha tak tak beneficiary te hrilhhriat hi an maphurhna a ni” tiin, “Vanduaina emaw chhiat tawh thulha Rs 2,00,000 vel lak theihna Rs 15 kumtina bank-a deposit duh mi tam tak an awm ka ring a, mi tam tak chuan an hriatloh avangin heng scheme te hi an ti lo a ni”, a ti.
PM Ujjwala Yojana (PMUY) scheme kal meka Gas connection neih theih chungchang te hria an tlem bakah diltu an tlem chu mipuiin an hmelhriat that tawk loh vang a nih thu Larsap chuan a sawi a. “Hengah te hian Gas distributor te leh sorkar official te an tan a ngai hle a ni” a ti a. Pradhan Mantri Suraksha Bima Yojana (PMSBY),Pradhan Mantri Jeevan Jyoti Bima Yojana (PMJJBY), etc,. te pawh mipuiin an hriat a ngai tih a sawi bawk.