Aizawl : Champhai district level narco coordination centre (NCORD) committee chu nimin khan Champhai SP office-ah thukhawm a, kumina Champhai Police leh Excise fore te Heroin man belhkhawm kg 17 leh gram 465 a nih tawh thu leh hei hi Rs nuai 316.98 man hu a nih thu he thutkhawmah hian sawilan a ni.
Champhai district Addl. SP C. Lalengliana’n a sawi danin, kumin January ni 1 atanga nimin thlena Champhai Police-in Heroin an man tawh zat kg 9.7 niin, tualchhung market-a Rs. nuai 223.80 man hu a ni a. Methamphetamine mum 8,18,500, Rs. nuai 1637 man hu leh Pseudoephedrine mum 1,80,000, Rs. nuai 126 hu an man tawh.
Asst. Commissioner of Excise & Narcotics Vanlalvura Ralte pawhin Excise force-in kuminah Heroin kg 7.765, tualchhung rate-a Rs. nuai 93.18 man hu, Methamphetamine mum 1,50,700, Rs. nuai 452.1 man, Ganja kg 3.2, Rs 3,840 man leh Alprazolam mum 218, Rs. 2,180 hu an man tawh thu a sawi.
Champhai district Police leh Excise-in kumin chhunga Heorin an man belhkhawm kg 17 leh gram 465 niin, Rs nuai 316.98 man hu a ni.
NCORD thutkhawmah hian ruihhlo tawlh leh zuar mante dan ang taka an phu tawk hremna pek zel an nih theih nan leh pawikhawih nawn awm leh thinte ven kawnga tanlak tulna te an sawiho a. Myanmar ram buai avanga ruihhlo tawlh tunhma lam aia a tam zual thu an sawi.
Ruihhlo leh dan lova thil tih do kawngah district dangte nen inpawhtlang leh thawhhona tha tak neia hmalak a tul thu leh awmze nei zawka infinchhuah tawn zel a tul thu an sawi a. District Education committee kaltlanga zirna in tlawh leh Forest department hnuaia Wildlife week hman turah hetiang lam hawia inzirtirna pek tel tha an tih thu sawiin, NCORD committee member ten ruihhlo do nana tanrual entirnan joint operation remchang hmasaberah neih an rawt bawk.
Thutkhawm kaihruaitu NCORD chairperson, Champhai Bawrhsap James Lalrinchhana’n Mizoram mai nilo India ram laili thlenga ruihhlo tawlh thlakin bu a khuar theih avangin ramri depa awm Champhai district atanga theihtawp chhuaha hmalak a tul thu a sawi a. Champhai district-in engtin nge hma a lak tih leh ruihhlo do kawnga tanrualna chu mite thlir leh ngaihchan a nih avangin inthlahdah lo leh inenfiah chung zela kal a tul thu a sawi bawk a ni.