Mizoram a professional boxing inelna lian ber Tata Yodha 4×4 LPS Pro Fight 2022 chu zanin dar 8-ah a hmawr bawk a ni dawn a. Boxing hruaitu hlun Dr. Zorammawia Ralte hriatrengna pualin ‘Dr. Zorammawia Night’ Final khelh a ni dawn.
Boxer 210 chuang telna inelna lian final hi R. Dengthuama Indoor Stadium-ah neih leh tur a ni a. Final-ah hian rihna huang panga a champion inchuhna inhnek a awm dawn.
Flyweight – Laldinsanga v Samuel Lalthlamuana
Mizoram a vawi sarih champion tawh kum 19 mi Laldinsanga hi National huap a Best Boxer leh Best Challenger a thlan a ni lo ni tawh.
Tun tumah hian a khingpui tur Saitual rawlthar hi a knockout a nih chuan vawi li a inlanah knockout vekin hnehna a chang dawn tihna a ni.
Professional boxing a thlensan inbeisei Laldinsanga hian, “Ka chak dawn tih ka chiang a, round hnih kan hmang zo lo ang” tiin a sawilawk.
A khingpui tur kum 18 mi Samuel Lalthlamuana hi tun Pro Fight-ah vawi ruk a chak tawh. Amah aia upa leh tawnhriat nei tha zawkte lakah a thiamna leh thahrui ngah a chhawr hle. Laldinsanga hi a lakah rinkai zawkah tang mahse round li a din tluanpui chuan chak theihna hun a nei ah a inngai.
Super bantamweight – F Zoramchhana v Lalrinngheta
Mizo professional boxer zinga tawnhriat nei ngah pawl F. Zoramchhana hian November hian Asia title chuh a tum a. Hemi tura inbuatsaih lai niin tun tum Pro Fight-ah pawh champion tura rin a hlawh a, a inlan chinah a che tha thei hle.
Pro Fight title chuhin vawi hnih a inlan tawh a, a tum thumnaah a vanneih hun hmasa ber a thlen ngei a beisei.
“Eng thil nge thleng dawn ka hre lo va, a theih dan danah hnek tluk erawh ka tum a ni. Round khatnaah pawh a a tul chuan kan zo mai ang.” tiin a sawilawk.
A khingpui tur Lalrinngheta hian semifinal-ah thiamna tha tak hmangin Lalpektluanga a hneh a, professional a luhchilhna ni nghalin vawi hnih chak zawn turin hmabak hautak a sut tlang a tul.
A tana chakna ni tur chu a hnek thui thei zawk a ni dawn a, ngil leh rang taka ‘combination’ hmanga a hnek zawn thiam chu a tan a khingpui lakah chak theihna ralthuam hlauhawm a ni ang.
Super Featherweight – Yuri Lalbiakdika Sanate v Lalrosangzuala
Inelna inthlitfim hnuah Yuri Lalbiakdika Sanate hian fighter tha leh khelh dan inang lo tak tak – Lalramdinliana (Sairang Dinthar), Nazareth Lalthazuala (Zemabawk) leh Lalmuanpuia (Lunglei Luangmual) te a hneh. A thiamna leh thatna hei hian a tilang chiang.
“Kan khua Vaitinah LPS Pro Fight title hawn ka tum ruh hle a, ka taksa dinhmun a tha tawk a, theihtawp chhuahin ka bei dawn a, a pui thei ang berin a ni mai.” a ti.
Lalrosangzuala’n semi final-ah H Lalnunhlima a hneh a, a chak danin sawisel a hlawh zui. A hnek nat avangin en bing a hlawh phah a, a khelh hnuhnun berah a hnek chhuah tlem avangin a talbuai thui teuh.
Tharum leh thahrui ngah, hnek chhuak reng thei hmaah a ding dawn, a fimkhur a ngai ve dawn. “Hmuhnawm tak a nih loh pawhin rapthlak tak a ni ang. Dam nawmzia leh hrehawm tuawrh a hrehzawmzia kan hre dawn a ni.” tiin a khingpui a vau lawk.
Super Lightweight – Vanlalawmpuia v HC Lalramfela
Professional boxing a vawi sarih inlan tawh Vanlalawmpuia hi 2019 Pro Fight title fight-ah inhnial theih takin a tlawm a, chhang let turin a hmabakah hun tha a awm.
Quarter-final a chak dan erawhin sawi a hlawh a, LT Mawia a hneh hram. Semi-final ah insiamtha in Stephen Lalramsan Varte a knockout thung.
“Min hneh a tum bawk a, a hriat mai ang. Tun hma chuan Ramfela a rorum thin a, tunah chuan a chuai tawh. Vanlalawmpuia hun a ni tawh a, ambulance leh doctor an awm dawn bawk a, a nih nih kan ni mai ang.” a ti.
Chawngtlai boxer Ramfela’n “Awpa hneh ka chak avangin super lightweight-ah ka khel dawn a, ka inbuatsaihna ang takin ka bei ang. Tu nge an nih tih lam aiin ka hmaa ding hrim hrim chu hneh vek ka duh.” a ti. 2015 Pro Fight champion Ramfela’n a boxing zinkawng a fiahna lian a hmachhawn dawn.
Super Welterweight – Zomu-ansanga v C Lalhruaitluanga
Zomuansanga’n final a luh nan mi pathum a hneh a, amah bei tawk a la tawng lo. Chak leh lehlam nawr hneh thin Chawngtlai tlangval hmaah a thiamna leh a theihna tak tak a lang dawn.
C. Lalhruaitluanga’n professional boxing vawi li a khelh tawhah chak vekin tun tumah pawh a khingpui tur ang bawkin amah tum tawk a la tawng lo.
“Zam lo ve, tum dang zawng aiin ka hnek chhuak hnem dawn a, a dawng hnem khawp ang. Ka hnek tluk ngei pawh ka ring a ni.” tiin a sawi.
Dr. Zorammawia Night – Final Inhnek turte :
Super Flyweight – Round 4
Laldinsanga (Lunglei Ramthar, pro record – 1 win (1 ko), 0 loss, 0 draw) vs
Samuel Lalthlamuana (Saitual, pro record – 1 win, 0 loss, 0 draw)
Super Bantamweight – Round 4
F Zoramchhana (Cherhlun, pro record – 4 win, 1 loss, 0 draw) vs
Lalrinngheta (Tuipui, 1 win, 0 loss, 0 loss)
Super Featherweight – Round 4
Yuri Lalbiakdika Sanate (Vaitin, pro record – 1 win, 0 loss, 0 draw) vs
Lalrosangzuala (Chaltlang, pro record – 1 win, 0 loss, 0 draw)
Super Lightweight – Round 4
Vanlalawmpuia (Khuangthing, pro record – 5 win (4 ko), 1 loss, 1 draw) vs
HC Lalramfela (Chawngtlai, pro record – 4 win (1 ko), 0 loss, 0 draw)
Super Welterweight – Round 4
Zomuansanga (Khatla South, pro record – 1 win (1 ko), 0 loss, 0 draw) vs
C Lalhruaitluanga (Chawngtlai, pro record – 4 win (2 ko), 0 loss, 0 draw)
Lawmman sem turte:
GIG Motors Fighter of the Night (Rs 2,500)
KT Enterprise Best Boxer
- Panasonic Washing Machine kg 8 + Trophy
KT Enterprise Best Challenger
- Trophy + Rs 8,000
KT Enterprise Promising Boxer
- Trophy + Rs 8,000
PC Lalnunmawia Trophy for Best Referee
- Trophy + Rs 6,000
PC Lalnunmawia Trophy for Best Judge
- Trophy + Rs 6,000
Champion : Rs 50,000 + medal
Runner-up : Rs 20,000