Tun hnai kum eng emaw zat chhunga United States nuaitu na ber, Hurricane Ian chuan Caribbean atanga Florida a luh hnuah chhiatna tam tak a thlen.
Tual chhung mite chuan mi sang tel chhanchhuah nghakin an awm mek niin an sawi a, mi 10 vel thi an awm tawh a, an pun ngei a rinawm hle bawk.
Ian hian Florida a luh hnu lawkah a chakna hlohvin tropical storm a ni zui nghal a; mahse, Atlantic Ocean-ah lut lehin hurricane chakna nei khawpin a insiam leh a, South Carolina leh Georgia a nuai leh dawn a. Thlipui na tak, ruahpui vanawn leh tui lian thlen thei a ni.
Gulf of Mexico a paltlang lai khan Ian hi Category 4 hurricane a ni a, darkar khata km 241-a chak thlipui kengin tui nasa taka a tihfawn bakah tui chim chin a tisang a, tuipui kama chengte tan tui lian thlenin mi sang telin power an neih loh phah.
Florida Governor Ron DeSantis chuan an chhiatna tawh chu ‘kum 500 chhung tui lian’ tiin a sawi hial.
“Hetiang reng renga nasa hi heng laiah kan la hmu ngai lo,” a ti.
National Hurricane Center (NHC) chuan Ian hi a la kal zel avangin a thlenna tur chinah nunna atana hlauhawm khawp a la ni zel tih an sawi bawk.
Ian hi tuipui atangin Florida-a Fort Myers-ah khawmual a kai a, sumdawnna hmun leh chenna in tam tak thlipui leh tui lianin a tichhia a, inkalpawhna kawngpui pawimawhte a ping bawk a. Sanibel Island leh Pine Island-a cheng tam tak chu ram laili nena an intlawhpawhna a chhiat avangin tlawhpawh theih an ni lo mek.
Lui tui lianin kawtthler a chim a, tuipui atangin tuifawn nasain tam tak a len lut bawk.
Fort Myers Beach-a councillor, Dan Allers chuan tui fawn hi feet 12-14 zeta sang a nih thu a sawi.
“Chhiatna thleng hi kan lo rin phak baka nasa a ni a, tuiin mi thil leh chenna a len lai kan thlir a, hmuh hrehawm tak a ni,” tiin BBC a hrilh.
Tui lian avanga tangkhangte chhanchhuah hna chu lawngleng leh helicopter hmanga thawh mek a ni.
Naples khuaah chuan kangthelhtuten awm thlenga tling tui daiin chhanchhuah hna an thawk a, an chhanchhuah zingah hian a car chhunga tang nu pakhat a tel nghe nghe.
Florida hi hurricane na tak tak lo tuar fo tawh thin an ni a, an state chhunga US khawpui lian ber berte pawhin an lo tuar fo tawh thin.
Florida International University-a meteorology professor Hugh Willoughby chuan hmar lam atanga Florida vaukam hrula chak taka tuipuia tui luang, Gulf Stream chung lum chuan hurricane hi a siam niin a sawi.
“Hurricane-te hian an chakna hi tuifinriat tui lum leh Gulf Stream innawk atangin an la thin,” a ti.
Kum 2004 khan Florida-a Gulf Coast a luh hma lawk thlenga Category 4 la ni, Hurricane Charley chuan nuaiin mi pakua thiin $ tluklehdingawn 6.8 hu vel thil a tichhia niin NHC chuan a sawi.
Kum 2017-a Hurricane Irma-in Florida Keys a nuai phei kha chu Category 5 lai a ni.