Congress president thar tur thlannaa atana chuh tura hming pek luh hun chu Zirtawpni khan a tawp ta a, mi pathumin chuh turin hming an pe.
Madhya Pradesh chief minister hlui, Digvijaya Singh chu chuh tura sawi rik ni mah se hming pek luh theih hun khar niah an hruaitu hlun, Mallikarjun Kharge a kian ta zawk.
Hetih lai hian tun inthlan tura thawm nei na leh an state-a a ro an relna lam thlenga nghawng na tak nei, Rajasthan Chief Minister Ashok Gehlot pawhin Singh-a ang bawk hian hun tawp dawnah a thulh leh thut bawk.
“Pu Kharge-a hi nimin khan hmuin inthlan chuh a tum a nih chuan ka chuh ve dawn lo tih ka hrilh a, ani hi min hruaitu a ni a. Niminah kha chuan chuh a tum loh thu a sawi a; mahse, vawiinah chanchinbu atangin a chuh dawn tih ka hre leh a, tukinah hmu lehnghalin a chuh dawn chuan ka chuh ve dawn ta lo a ni,” tiin Singh chuan a sawi.
Hruaitu pahnihte hi Zirtawpni tuk khan Kharge-a inah an inkawm a ni.
Zirtawpni kha Grand Old Party president tur chuh tura hming pek theih hun tawp a ni a, party boss thar tur a hriat hnai.
Mi dang zawng aia president chuh tura sawi rik rin leh thawm nei na, Gehlot-a chuan Ningani khan a chuh dawn loh thu a sawi veleh bawk a. Gehlot-a hi Gandhi chhungkua pawhin an duh a ni a; mahse, an state-ah amah thlawptu MLA-te chuan thlan tlin a nih hunah a aiawh tura Sachin Pilot-a dah a nih chuan an vaia an bân tur thu sawiin an hel a, boruak pawh a lian hman hle a ni.
Congress president thlan tur hi hming pathumin chuh tumin hming pe lut mah se a langsar pahnih chu Tharoor leh Kharge an ni a, Tripathi chu sawi len a ni lem lo.
Kharge-ah hian Rajya Sabha-a eptu leader a nihna pawh an party-in ‘mi pakhatin chanvo pakhat zel’ tih kalphung an neih zawmin a bânsan dawn nia sawi a ni.
Kharge-a rawttu zingah hian hming lian tak tak – chief minister hlui Bhupinder Singh Hooda, Singh leh Prithviraj Chavan te bakah defence minister hlui AK Antony, party thupuangtu AM Singhvi leh union minister hlui Ajay Maken te pawh an tel.
Congress president thlan turah hian official candidate an awm dawn lo va. Gandhi chhungkua chuan tan lam an nei lo tih lantir nan vote an thlak dawn lo nia sawi a ni bawk.
Rajasthan Chief Minister Gehlot-a chu inthlan a chuh ve dawn tih sawi thawm a awm hnua amah thlawptu MLA rualte an state-a an hel avangin Ningani khan party chief Sonia Gandhi hnenah ngaihdam a dil a, inthlan a chuh dawn loh thu a sawi zui.
Gehlot-a hi a tirah chuan Gandhi chhungkua pawhin party chief ni tura an duh ber a ni a; mahse, an state-a helna chhuak hian a dinhmun a tihniam hle a. Gandhi-i pawhin chief minister a ni zui dawn em tih a tichiang thuai dawn nia sawi a ni.
Tun hi Gandhi chhungkaw tel lova kum 20 chuang hnua Congress inthlan leh hmasak ber a ni.