Nakkum MLA inthlanpui lo awm tur atana Congress party manifesto pakhatna chu nimin khan MPCC President Lalsawta’n a tlangzarh a, sorkarna an chan hunah chuan Mizoram hi ram nuam, him leh ram hausaah siam an tum niin a sawi.
Congress Bhavan-a tlangzarh inkhawmah thu sawiin Lalsawta hian, “Kan manifesto hi tihhlawhtlin theih vek a ni a, tihhlawhtlin theih loh tur engmah manifesto-ah kan dah lo. Pathian leh mipui zara kan sorkar theih hlauh chuan hemi hmang hian Mizoram hi ram nuam, him leh ram hausaah siam kan tum a ni,” a ti.
Lalsawta hian sorkarin lo neitu te, kuthnathawk te, thalai rual ten eizawnna ngelnghet an neih theih nan ruahmanna tha tak siamin an pui dawn niin a sawi a. “Mi tinin mahni eizawnnaa kan bur char char a, kan ram hi taima, thawkrim leh tangte dinchhuahna rama kan siam chuan vawiina kan khawtlang nuna harsatna tam tak hi a kiang dawn a ni,” tia sawiin, state sorkar nen sum leh remruatna tha hmangin tangte a pui ang a, a tul angin dan (law) a siamin dan hnawk a thian fai bawk dawn niin a sawi.
Congress manifesto pakhatna hi a hlawhtlin theih nan Mizoram mipuite tanpuina leh thlawpna ngenin manifesto hi kum 2023 inthlan hmain a khât tawka tlangzarh thin tum a nih thu a sawi bawk.
Inkhawm hi Ronald Sapa Tlau, ex-MP, Vice Chairman, Manifesto Drafting Committee-in a kaihruai a, minister hlui Lalrinmawia Ralte, Secretary, Manifesto Drafting Committee-in manifesto a sawi fiah.