- Lallunghnema, Charity Lodge
Tun hnaia ka article-ahte khan Mizoram State Consumer Commission thubuai remna thenkhat ka rawn tarlang a.Chu bakah Consumer Commission dinhmun, tih tur leh mawhphurhnate ka rawn tarlang bawk a ni. Tin, Consumer Activist ka lo nih ve na anga kan hmalakna leh hlawhtlinna thenkhatte ka rawn sawi tel bawk a nih kha. Consumer Huang neia consumer right leh a kaihhnawihte ka rawn tarlan thin na chhan chu mipui hian consumer kan nih anga kan mawhphurhna te leh kan tih ngei ngei tur kan lo hriat theih nan sawi ka ni ber a. Kan thu leh hlate hi chhiar liam mai mai lo va, lo chhawr tangkaitu an lo awm zel te hi ka lawmna tizualtu a ni thin.
Tun kar kalta mai pawh khan ka beisei loh leh ka rin loh takin maiin kan Mizo ram Chief Secretary hlui pakhat chuan consumer issue-a harsatna a tawh thuah min lo phone ve teh mial a. Ka lawm viau rualin a dik tak chuan ka zak ru deuh a ni. Mahse, kan CS hlui harsatna chu ka lo ngaithla a,CPA 2019 bawhchhiatna ni ngeiin ka hria a.Chuvangin ka theih ang angin ka buaipui ta nghal a. Chin fel hram a duhawm hle a ni. Chutianga kan chinfel sak thei ngai a nih chuan a lawmawm hle dawn a. Consumerte tan bung thar kan rap ngei ang,tih ka ring.Consumerte tana hnehna a ni bawk ang.
He Huangah ngei hian article-ah kan la telh turah ngai ila, a tha awm e.
Hetih lai hian chhim lam atangin phone call ka dawng a. Rawng bura (paint) an lei chungchanga Dawr pakhat laka an lungawi loh thu a ni ve thung a. Hei pawh hi kan han buaipui chu a ni a. Eng tak ang maw le? Mizote hian consumer awareness kan tlachham,kan nei lo lutuk, kan tih rual hian kan beihna a lo rei ta deuh bawk a, kil hrang hrang atangin complaint kan dawng ve ta zel mai. Awareness pawh a kal reng a nih hi!Hei hian a kawh ber nia lang ta chu, Mizoramah Consumer Movement a awm a, miin an dikna leh an chanvo an hre tan tih hi a ni. Complaint chi hrang hrang kan dawng zel a, kan umzui man kan la ve lo te hi kan inchhuanna a ni ve tlat!
Mizoram Consumer Advocacy Group ho WhatsApp group ang deuh chauh a la ni a, information forum ang deuh a ni nain a tangkai em em dawn a ni. He whatsApp group-a kan thianpa report hi a ngaihnawmin a bengvarthlak hle. Heti hian a rawn post a, “Tuna gas cylinder ka rawn thawn hi ( a bur ruak thlalak ka rawn tilang e-ll)August thla a kan lak a ni a. Vai mutia in an rawn deliver thin hi ka lo check kher si lo va, (ni dangah chuan ka check vek thin a, tuna mi hi ka lo check loh tum kher a ni a) kan han hmang dawn a, a ruak a lo ni tlat mai a. Agent te(agent hming sawi lo mai ila -llh) kan va bia a, a dang min pek theihloh thu leh kan duh chuan a hmuna a bur ruak chu kalpui a, a dang nen, ‘khul’ tir theih thuin min lo chhang a ni. Ka rawn sawi chhan ber chu, vai mutia an chhawrte gas rawn dah hi a ruak nge ruak lo tih uluk takin check vek thin ang u… tih hi a ni.
Tunah chuan kan thupuiah kan lut tawh ang. Sap tawngin sawi tan leh mai ang aw! Hre thiam chiah lo kan lo awm a nih pawhin bula mi te zawt zel mai ila, “False promise of weight loss is an unfair trade practice” – State Consumer Disputes Redressal Commission declared misleading advertisement about weight loss programmes is an unfair trade practice – dismissing appeal by VLCC, against DCDRC order to refund entire programme fees to the complaint along with damages — loss 4 kgs in 30 days Or take money back which falls under the definition of misleading advertisement as defined in sec 2(28) of the CPA 2019 failed.”
Heta kan hriat ang hian mi pakhat chuan a taksa rihna(weight) tih tlem a duh avangin VLCC a pan a. He service provider VLCC hian an in–advertise-naah chuan an weight loss programme hmangtute chuan ni 30 chhungin an taksa rihna(weight) chu 4 kg- in an tihhniamsak thei tih an sawi a. He weight loss programme atan hian customer -te chuan fee an chawi thin a ni.
Mahse VLCC intiam leh inzawrh ang hian ni 30 chhungin an rihna(weight) chu a tla thla thei chuang lova. Helai tak hi a point chu a ni.Chuvangin unfair trade practice leh misleading advertisement tia puhin VLCC hi District Consumer Commission hmaah khin a ni ta a ni.
Tichuan, District Commission chuan VLCC hi thiam loh a chantir ta a. Mahse, VLCC chuan District Consumer Commission thutlukna chu pawm lovin State Consumer Commission hnenah an zualko ve leh ta a. State Commission chuan ngun taka a ngaihtuah hnuin District Commission Judgement & Order chu lo pawmpuiin VLCC hi thiam loh a chantir ta a ni. Mipui bumna leh intiamna tipuitling lo te hi dan bawhchhia an ni a. Dawt hmanga mipui bumna tha lo tak a ni bawk. Consumer definition hian a huam zau em em a. Bazar hmuna thil leitu, bungraw chi hrang hrang leitute chauh hi consumer an ni lo va, mi dangte tha leh zung(service) hmansaktute pawh hi consumer an ni tlat mai. Consumer Protection Act 2019 hian consumer ni thei, dikna leh chanvo tha tak neitute hi a huam zau tir em em bawk a ni. Kan sawi thin angin in satute chu service provider an ni a. Pawisa senga an tha(service) lo chhawrsak tute pawh hi consumer an ni thei tlat. A fiahna ber chu, ‘Mi zawng zawng consumer kan ni’ tih hi a ni mai. Chhungkaw tinin nitin thil kan lei a, a leitu chu mihring a ni. Mihring thil lei leh hman chu a tha ang a, a thianghlim ang a, a felfai tur a ni. Lei leh hmanna a sum sen leh bungrua leh tha leh zung sen chu a inphu tawk tur a ni. Sawrkar chuan dik tak leh fel taka miin thil a leia a hman theih nan rate a siam zel a. Thil man pawh a bituk thin. Thil man bituk leh hman man bituk bak pawisa inpek leh lak chu consumer right pawisak lohna lian tak a ni a. A chuang a liam a sum senna mai mai a ni a. Mipui sum tihchingpenna lian tak a ni. Corruption vulh lenna a ni.
Pawisa ren lo leka thil lei mai mai te, thil lei hma a en chiang hmasa lova thil lei ringawtte hi atna chikhat a ni tih lo hre tawh ang che. Misleading Advertisement lakah fimkhur la, sumdawngte thangkamah awk tawh suh. Consumer Right i hriat chuan mi fing i ni tihna a ni e. I thil lei leh hmana i lungawi loh chuan Consumer Advocacy Group chuan kan pui thei reng che a ni.