Aizawl: Chief Minister Zoramthanga chuan thangtharte zingah a changkang apiangin upate hlutna an ngai pawimawh thin tih a sawi.
Inrinni khan Mizoram Upa Pawl (MUP) huaihawtin Mizoram hmun hrang hrangah ‘Upate Ni’ hman a ni a. Zemabawk North YMA inah Zemabawk North Area MUP buatsaiha lawmna inkhawm buatsaihah thu sawiin bialtu MLA, Chief Minister Zoramthanga hian kum lama upa zawkte hian an vanneihzia leh hlutzia an hrethiam lo ang tih a hlauhpui thu sawiin, upaten tawnhriat leh finna an chharte hi thalai, taksa la chak thate hian hmang thei se a duh tih a sawi.
“Kum upat ang zelin finna leh thlarau nunah kan nghet tulh tulh a, tangkai lo emaw kan inti mai ang tih ka hlau thin a, kan tangkai telh telh zawk thin a. Thangtharte zingah a changkang apiangin upate hlutna an ngai pawimawh thin a ni,” a ti.
Chief minister hian kum upat lam hi an hman thiam a pawimawh tih sawiin, kum la naupan laia an tih theih ang leh an tlin angte kha an tlin tawh lo tih an pawm thiam a ngai tih a sawi.
Upatna hi lungngaih nana leh mahni inkhawngaih mai loa Pathian hnena tlu lutin, an vanneihna zawk hi an hmun leh chuan an nun a hlim ang a, an hrisel anga, ram leh hnam, chhungkaw tan mi hlu an la ni zawk thei niin a sawi.
Upate Ni lawmna inkhawm hi Zemabawk North Area MUP President CVL Rosanga’n a kaihruai a, JL Khawkunga, Senior Adviser kaihhruaiin an member boralte sunna hun an hmang bawk.