LPS buatsaih professional boxing inelna Tata Yodha 4×4 LPS Pro Fight 2022 final zan ‘Dr. Zorammawia Night’ chu Zirtawpni zan khan neih a ni a. Rihna huang panga a inelnaah champion zawnna inhnek a thleng.
Final hi R. Dengthuama Indoor Stadium-ah neih a ni a. Boxing hruaitu hlun thi ta Dr. Zorammawia hriatrengna pual a zan hi hman niin a chhungten an telpui a. Dr. Zorammawia chhungte hian champion tinte hnenah Rs. 5000 theuh an pe.
Flyweight-ah amateur boxing a hnuhma nei tha tawh tak mai kum 19 mi Laldinsanga chuan a khingpui Samual Lalthlamuana chu round thumnaah knockout in a hneh a. A champion.
Lunglei Ramthar rawlthar Dinsanga hi a kutthlak a nat bakah a thiam tel a. Tun LPS Pro Fight-ah a inlan hnuhnung pali atang knockout vekin a chak. KT Enterprise Best Boxer a thlan a ni.
Super Bantamweight-ah Tuipui boxer Lalrinngheta chuan Mizo professional boxer zinga tawnhriat nei ngah pawl F. Zoramchhana chu a hneh a. Inhnek hmuhnawm leh inhnektawk takah split decision in a chak.
Kum 20 mi Lalrinngheta hian rang leh ngil tak taka ‘combination’ a hman thiam em em bawk a chhawr tangkai leh a. Professional boxing-ah vawi hnih a inlan atangin vawi hnih a chak tihna a ni.
Super Featherweight-ah hnek na tak mai boxer hmuhnawm Lalrosangzuala chuan Yuri Lalbiakdika Sanate chu majority decision in a hneh.
Round li chhungin 39-37, 38-38, 39-37 a chak zawk a puan a ni a. Tharum ngah zawk a chungnung.
Super Lightweight-ah Mizo boxing huanga tawnhriat nei tha pahnih an inhmachhawn a. Split Decision in Vanlalawmpuia’n HC Lalramfela a hneh.
AwP-a chak danin sawi a hlawh a, mi tam takin Ramfela’n a tawh ngun zawk avangin Chawngtlai boxer chu chak zawk turah an ngai. Mahse pumrua a lian zawk AwP-a hian chiang taka hnek a ngah zawk a, judge-te hmaah point hmu turin a tawnhriat a hmang thiam.
Inhnek hnuhnung ber Super Welterweight-ah C Lalhruaitluanga chuan Zomuansanga a hneh a. Majority decision in a chak.
Zomuansanga’n tum danga a tih angin a khingpui hi a nawr chiam thei lova. Hruaitluanga’n a tawnhriat ngah tawh a hmang thiam hle.
Flyweight – Round 4
Laldinsanga (Ramthar, Lunglei) bt Samuel Lalthlamuana
= Knockout (Round 3, 2:48 min)
Super Bantamweight – Round 4
Lalrinngheta (Tuipui) bt F Zoramchhana
= Split Decision (36-40, 39-37, 39-37)
Super Featherweight – Round 4
Lalrosangzuala bt Yuri Lalbiakdika Sanate
= Majority Decision (39-37, 38-38, 39-37)
Super Lightweight – Round 4
Vanlalawmpuia (Khuangthing) bt HC Lalramfela (Chawngtlai)
= Split Decision (39-37, 39-37, 37-39)
Super Welterweight – Round 4
C Lalhruaitluanga (Chawngtlai) bt Zomuansanga (Khatla South)
= Majority Decision (39-37, 36-40, 38-38)
GIG Motors Fighter of the Night (Rs 2,500)
- Vanlalawmpuia (Khuangthing)
KT Enterprise Best Boxer (Panasonic Washing Machine kg 8 + Trophy)
- Laldinsanga (Lunglei Ramthar)
KT Enterprise Best Challenger (Trophy + Rs 8,000)
- Yuri Lalbiakdika Sanate (Vaitin)
KT Enterprise Promising Boxer (Trophy + Rs 8,000)
- Lalrinngheta (Tuipui)
PC Lalnunmawia Trophy for Best Referee (Trophy + Rs 6,000) - Lalchhanhima Hnamte (Armed Veng South)
PC Lalnunmawia Trophy for Best Judge (Trophy + Rs 6,000) - Lalmalsawma (Hnahthial)
Champion : Rs 50,000 + medal
(Dr Zorammawia chhungten weight pangaa champion hnenah Rs 5,000 theuh an pe)
Runner-up : Rs 20,000