India chuan ram venhimna lam atan hmanraw thar a nei leh ta a, Thawhtanni khan Indian Air Force hman turin tualchher Light Combat Helicopter, Prachand tia a hming an vuah chu hlan a ni a, he indo thlawhna hi missile leh ralthuam dang pawh kap thei a ni.
“Hei hi India-in ama kutkawih ngeiin ram venhimna hmanrua a siam thei a ni tih pho chhuahna hun a ni,” tiin sipaite hnena hlanna inkhawmah Union Defence Minister Rajnath Singh chuan a sawi.
Light Combat Helicopter (LCH) hi sorkar hnuaia awm, vansang lam hmanraw siamtu, Hindustan Aeronautics Ltd (HAL)-in an duan leh siam niin hmun sanga hman deuh bik atana ruahman a ni.
Jodhpur, Rajasthan-a IAF hmuna an hnena hlanna hun hi defence minister bakah Chief of Air Staff Air Chief Marshal VR Chaudhari pawhin a hmanpui.
Defence minister hian helicopter thar hming chu ‘Prachand’ tih a nih thu a puang a ni.
Helicopter tê leh zangkhai hi kum lo la kal zel turah Indian Army leh IAF-in ram venhimna atana an chhawr rim ber tur zinga ngaih a ni a. Tonne 5.8-a rit, engine pahnih hmang niin a hmaa enchhinna lo kalpui tawhah ralthuam chi hrang hrang a kap thei a ni tih thuneitute chuan an sawi.
“American Apache chopper kan nei sa a, tuna mi ai hian a lian zawk a. Prachand hi chu a hmanna tur a tam zawk a, thil tam tak a ti thei a, a bikin hmun sangah hmanna a tam dawn a, thil tam tak a phur thei a ni. Chopper duan zawng zawng hi Indian tih a ni a, Indian-te mamawh thlirin an duh anga duan a ni,” an ti.
Chopper hi Ladakh-ah enchhin a lo ni twah a, hetah hian Chinese drone-te chu boruak atanga boruaka mi vek kahna missile-in a chhu chhe thei a, leia tank awm pawh boruak atanga khawmual kahna hmanruain a kap chhe thei bawk.
Indian Army hnenah Pradhan hi 95 pek an ni ang a, IAF hnenah 65 pek an ni ve dawn thung a. A siam nan hian Rs. Vaibelchhe 3,500 ruahman a ni a, hei hi ennawn tur a la ni a. Helicopter thar siam zelah belh ngai a awm dan azirin ennawn a ni ang.
LCH hi Advanced Light Helicopter Dhruv nen angkhat deuh an ni a. Stealth niin amah invenna pawh a nei tha a, zan lama hmelma beih theihna hmanrua, chetsual palh a awm pawha tum theih dan pawh a chhawm a, hei hian a chuangte dam chhuahna chance pawh a sang a ni.