Bangladesh-ah mihring phur lawng tlan chak chi leh balu phur lawng insuah mi 26 vel an thi.
Police-te chuan speedboat-ah hian mi 36 chuang an chuang a, Mawa thliarkar atanga chhuak an nih thu an sawi a. Shibchar thingtlang khaw bul lawka Padma River-a balu phur lawng nen an insu tih an sawi.
“Ruang 26 kan hmu tawh a, an zingah hian hmeichhe pakhat a tel a. Mi dang panga erawh damin kan la chhuak a, an zingah hian naupang pathum an tel,” tiin police hotu, Amir Hossain chuan a sawi.
Hossain chuan mihring phurtu zawk hian na takin balu phur hi a vang zawngin, a lai tak velah na takin a su a, amah pawh a pil nghal tih a sawi.
Chhiatna thlenna laia sorkar hotu lu, Rahima Khatun chuan speedboat hian sorkar dan zam a bawhchhia tih a sawi a. Coronavirus avanga inkharkhip puan mek a nih laia hetianga mihring phura a tei chhuak hi a dik loh thu a sawi.
Tui lut thiam leh tual chhung miten ruang 26 hi an phawrh a ni a, mi dangte an zawng zui mek bawk.
Chetsualna thlen lai hmutu pakhat, Abdur Rahman chuan lawng insu thawm hi a ring hle a, lawngte hi an khup thawk ve ve niin a sawi.
“Hmanhmawh taka a hmun kan va thlen chuan speedboat hi bung hnihin a lo awm a, khaw mite chuan chhanchhuah hna kan thawk nghal a, police leh fire brigade an lo thleng zui ta bawk a ni,” a ti.