Pathianni zan khan Tehran-a university hriat hlawh takah sorkar duh lohna nasa taka lantirnaah tharum thawhna nasa takin a thleng.
Sharif University of Technology lirthei hunna hmunah zirlai eng emaw zat tangin pawn lamah venhim hna thawktuten an hual vek nia sawi a ni.
Video pakhat thehdarhah chuan zirlai eng emaw zat silai a rik avanga tlanchhia hmuh tur a awm.
Sorkar duh lohna hi September 17-a police-in an man hmeichhe pakhat a thih atangin a intan a ni.
An ram a buai hnua a vawi khat nana vantlang hmaa a inlan hmasak berah Supreme Leader Ayatollah Ali Khamenei chuan Mahsa Amini-i thihna chu ‘thil thleng duhawm lo tak’ a nih thu leh ‘ka thinlung a tina tak zet a ni’ tiin a sawi.
Hetih rual hian ram puma lungawi lohna lantir chu ‘helna’ a nih thu a sawi a, United States leh Israel ramten an ruahman niin a sawi a, ‘suma an tham an agent-te nen, ram pawna Iranian awm, ram phatsantute nen’ hma an la niin a sawi.
Amini-i hi police-in Islam dan a bawhchhia nia puha an man hnuah nikhawhrelova awmin a thi zui a, nasa taka sawisak niin a chhungte chuan an sawi.
Vui a nih atangin lungawi lohna hi lantir tan niin ram pum a luah nghal a, kum tam tak hnua Iran-a thil duh lohna lantirna lian ber a tling tawh a ni.
Pathianni kha Sharif University of Technology-a first year zirlai turten an kai tan ni tur a ni.
Mehr news agency chuan Pathianni chawhnu khan zirlai 200 vel campus-ah pung khawmin ‘woman, life, freedom’ tih leh ‘zirlaiten thihna hi insawisak hlumna niin kan ngai’ tiin an au rual a. A rei hnuah an au hla chu a na tawlh tawlh a, a tawpah phei chuan an sakhaw hotute kal dan demna thlengin a kai ta niin an tar lang.
Tharum thawhna hi tlai lama chhuak tan niin venhim hna thawktuten campus an thlen velah a ni a. Mehr chuan venhim hna thawktute hian mittui tlaknaa an phuh bakah paintball-in an kap a, zirlai thenkhat chu university-a lirthei hunnaah an tlan lut ta niin a tar lang.
Social media-a video thehdarh pakhatah chuan lirthei hunna atanga tlan chhiat tum zirlaite chu venhim hna thawktute hian motorbike-in an um tih hmuh theih a ni bawk.
Video dangah chuan motorcycle-a kawtthlera tlan chhia te pawh a lang a, silai puak ri leh ‘Khamenei-a thi rawh se’ tia au ri pawh hriat tur a awm.
Report thenkhatah chuan zirlai eng emaw zat chu vuak leh pullet gun-a kah an ni a, 30 atanga 40 vel an man bawk nia sawi a ni.
Sorkar news agency, Irna chuan Science Minister Mohammad Ali Zulfigol-a’n campus tlawhin zirlai leh venhim hna thawktute a kawm hnuah boruak a tha ta niin a tar lang.
Mehr chuan Thawhtanniah university class chawlh puan niin online-a zirtirna kalpui tura tih a nih thu a tar lang.
Zan hnih chu Tehran leh khawpui lian dangah buaina chhuak tawhin thi pawh an pung mek zel.