Aizawl: Hnam pa, Mahatma Gandhi piancham puala kum tina Faina Hapta hman thin chu nimin khan MINECO junction-ah UD&PA changtu, Deputy Chief Minister Tawnluia’n a hawng.
Faina Hapta vawi 46-na hawngtu Tawnluia chuan Faina Hapta chhungin Mizoram sorkar pisa te, school, college leh zirna in hrang hrang te, damdawi in te, bazar leh mipui punkhawmna hmun hrang hrangah faina beihpuithlak a ni dawn tih a sawi.
Tawnluia chuan faina leh thianghlimna chu mahni in chhungah theuh bultan tur a nih thu leh chhungkaw tinin tihtakzetin tan la se a duh thu a sawi a. “Kum upa zawkte tih turah dah mai lovin thalaiten hma an hruai tur a ni,” a ti.
Kumin faina haptaa thupui ‘Bawlhhlawh paih hmaa thliar hran’ chu mahni in chhungah theuh bultan turin Dy CM chuan mipui a sawm a. Bawlhhlawh sawngbawl kawnga sorkar hmalakna sawiin, “Solid waste management centre, Tuirialah leh Kolasib-ah pilot project a awm mek a, Aizawl khawpui chhungah hmun hrang hrangah solid waste management centre din tum a ni a, a hmunhma turte pawh ruahman lawk a ni tawh,” a ti.
Swachh Bharat phase-II kalpui mekah Mizoram chuan ODF plus dinhmun a chuankai ngei theihna tura tan la turin kalkhawmte a sawm bawk.
Faina Hapta hawnna inkhawmah hian hemi denchhena inelna chi hrang hrang – essay inziahsiak category 1 leh 2, video insiamsiak leh slogan inphuahsiak lawmman te sem nghal a ni.