Inrinni khan President Putin-a chuan Ukraine ram chhunga region pali – Kherson, Donetsk, Luhansk leh Zaporizhzhia te chu an ram bung peng (annex) an ni tih pawmpuina a ziak fel tawh a; mahse, heng region zawng zawng hi an thunun vek dawn em a la hriat loh.
Thawhtanni khan Kremlin thupuangtu, Dmitry Peskov chuan khawi ber hi nge an awp tur lai tih an la tichiang lo niin a sawi a, Moscow hian eng angin nge ramri a then dawn a la hre lo niin a sawi.
Peskov-a hian Luhansk leh Donetsk region pum chu Russia bung khat niin a sawi a; mahse, Kremlin chuan ‘Kherson leh Zaporizhzhia region-a chengte chu ramri chungchangah a la rawn dawn’ niin a sawi.
Russia-in an ram chhunga mite an ram bung khat anga an chhiar zawng zawng hi Kyiv chuan lak let vek a tum a, kum 2014-a Russian sipaiten an lo laksak tawh, Crimea pawh lak let tel an tum.
Russian defence ministry chuan Putin-a enpuina hnuaiah thla hmasa atang tawh khan Russian-te thunun, Luhansk leh Donetsk region-ah mi beih dan zirtirna kalpui mek a nih thu a sawi a. Kremlin chuan sipai tur 3,00,000 chuang lak bakah tihpun zel a la tum bawk thu an sawi bawk.