India khawpui pakhat, Kolkata-a police-te chuan ramin zalenna a neih theih nana beitute hruaitu langsar ber, Mahatma Gandhi-a lem chu Durga Puja-ah ramhuai sual lema lantir a nih chungchang an chhui mek.
Hindu pathiannu, Durga chuan a tiang ki thum nei kengin pakhatin tiang pangngai a keng bawk a, hei hian sawi a hlawh ta hle a ni.
Tiang kengtu mipa hi Gandhi-a ni awm tak a ni a, sam lem leh hmuihmul an siamsak dan chuan sawi a hlawh zual a ni.
Gandhi-a hi India-ah chuan ‘Hnam Pa’ tia sawi a ni.
Tun hnaiah erawh Hindu sakhaw la run tam tak chuan langsar tak takin an sawisel a, Muslim lam tan leh Pakistan laka nem lutukah an chhuah.
Durga Puja hi kum tina Hindu-ten an lawm thin kût pakhat niin an pathiannu, Durga pual niin a lim pho chhuakin chibai an buk thin.
Khawpuia Kolkata hmangtu, West Bengal-ah phei chuan he kût hi an kûtpui ber a ni a, dawhsan siamin pandal an sa a, mipui tam tak a kokhawm thin.
Tun tuma Gandhi-a lem ni awm tak an dah telna pandal hi Hindu la vawng pawl pakhat, All India Hindu Mahasabha-in an siam a ni nghe nghe.
Tual chhung chanchinbute chuan he lim tlawhtu tam zawk chuan Gandhi-a lem ni awm tak dah tel hi an ngaihsak tehchiam lo niin an sawi.
Pathianni zan khan police thuneituten tlawh vein a buatsaihtute hnenah sam lem leh khabehmul dah belh turin an ti.
All India Hindu Mahasabha chuan The Hindu chanchinbu hnenah police-in an tih tlat avangin an tih angin an tidanglam niin a sawi.
“Kan zalenna kan tihlanna chu mih hliahtir a ni,” tiin Chandrachur Goswami chuan a sawi a ni.
Ramhuai lem a an tak hnuah hian ‘Gandhi-a nen pawh an inang ta hle’ niin a sawi a, an tum chu Hnam Pa anga siam hrim hrim a nih miah loh thu a sawi baw.
West Bengal-a political party hrang hrang chuan hetianga Hnam Pa tihbawrhban hi an dem thu an sawi a, news agency ANI chuan Congress hruaitu pakhatin police hnenah complaint a thehlut niin a tar lang nghe nghe.
BJP state president pawhin, “Hetiang hi a lo ni a nih chuan a vanduaithlak a, kan dem a ni,” tiin thuthar lakhawmtute hnenah a sawi.