Tun hnaia Aizawl veng pakhata hmeichhe naupang kum hnih leh thla nga mi thihnaah hursualna lam hawi thil fel lo awm theia a lan avangin he thila rinhlelh kai ber naupang thi ta pa chu tun Inrinni khan police-in an man a, a nu pawh chiang zawka thu zawhfiah turin Thawhtanni khan an man ve leh bawk.
Mizoram Police thuchhuahin a tar lan danin September 17, 2022 zing dar 12:15-ah Vaivakawn Police Station-in Ebenezer Hospital-a medical officer hnen atangin telephone kaltlangin an damdawi inah hmeichhe naupang kum hnih leh thla nga mi a boral thu leh a kap bawrah hursualna lam hawi thil fel lo ni theia lang a awm thu report an dawng a. Damdawi in pan nghalin naute ruang chu an enfiah hnuah enfiah nawn leh turin Civil Hospital, Aizawl-a medical officer hnenah an thawn a, doctor pahnih – gynaecologist leh forensic medicine & toxicology doctor ten endikin naute kap bawra thil fel tawk lo nia lang chu hursualna nena inkaihhnawih a nih theih thu an sawi.
He naupang thi hi hursualna tuartu ni theia a lan avang hian Enquiry Officer SI Lalsangbera Sailo, Zonuam Out Post OC chuan All Women Police Station OC hnenah enquiry report a thehlut a, chhui turin thubuai ziahluh a ni.
Police thuchhuahin a tar lan danin naute taksa atangin vaginal swab leh anal swab lain FSL-ah thawn a ni a. September 28, 2022-a report an dawnah chuan ‘semen’ hmuh a ni lo.
Naute thih chhan doctor-te hmuh dan chuan thawkna kawng vung/acute laryngotracheobrontis (ALTB) with severe respiratory distress tih a nih thu police thuchhuah chuan an tar lang a. Doctor-te chuan hei tak hi chuan mipat hmeichhiatna lam thil nen inzawmna a nei lo nia an hriat thu an sawi.
Naupang taksa enin hursualna lam nen inkaihhnawih theia a lan si avangin ngawrh taka chhui zui a ni a, naute nu leh pa leh chhung hnai leh mi dang eng emaw zat vawi eng emaw zat thu zawhfiah tawh an ni tih police thuchhuah chuan a tar lang a. Naute nu leh pate police-ten an kawmna atangin anmahni bak chu an fanu enkawla hetiang thil ti tur khawpa khawih ve dang an awm theia a lan loh avangin rinhlelhawm ber (prime suspect) an ni lo thei lo niin thuchhuah chuan a tar lang a, naute pa chu an man ta a, naute nu pawh chiang zawka thu zawhfiah turin an man ve leh ta bawk a ni.
Mizoram Police thuchhuah chuan, “He naupang khawngaihthlak takin rorelna dik a hmuh ngei theih nan mipuite tanpuina kan dil a, a chhuichhuahna kawnga min pui thei tur pawimawh hria kan lo awm a nih chuan rang taka police-te min hrilh hre vat turin mipuite kan ngen tak meuh meuh a, police hnena thu thlentute thup tlat a ni ang,” tiin a tar lang bawk.