Tlang sang lama chhiatna a thlen lai mek hian Uttarakhand-ah tho hian mihring phur bus pakhat chu kawr thuk takah tlan liamin mi 25 vel an thi bawk.
Thuneitute chuan Thawhlehni zan khan Pauri Garhwal district-ah mi 40 vel phur bus hi kawng thlanga kawr ruam thuk takah a tlan liam niin an sawi.
State disaster response force-in zan lama chhanchhuah hna thawh nghalah passenger 21 chu hima lak chhuah an ni.
Prime Minister Narendra Modi chuan chhiat tawk chhungte a tawrhpui thu Twitter-ah a tar lang.
Bus hian Laldhang atanga Bironkhal khaw pana kal inneihna hmang turte a phur a ni.
Chhiat an tawh chhan hi chiang taka hriat theih a ni lo va, state thuneituten an chhui zui mek.
Police hotu lian pakhat, Swatantra Kumar Singh chuan Nilainiah pawh khan chhanchhuah hna thawh chhunzawm a nih thu ANI news agency hnenah a sawi.
Thlalak thehdarhah chuan tlang awih takah bus hi a tang a, chhanchhuah hna thawktuten a dam chhuakte an la chhuak lai a lang.
Uttarkhand Chief Minister Pushkar Singh Dhami chuan chhanchhuah hna thawktute hi an mamawh apiang pek an nih thu a sawi.
India-ah hian kawngpuia chetsualna hi a tam hle a, kum tin mi kawng chhia leh lirthei khalh fimkhur tawk loh avangin mi 1,00,000 vel thi ziah ang a ni.
Bus hi India-ah chuan inkalpawhna atana hman ber niin a bikin khaw tenauin an hmang nasa a. A khalhtute hian himna dan zam an zawm vak lo va, an phur tam thei hle bawk.