Thailand hmarchhak lamah pre-school daycare centre-ah police-a tang thin pa pakhatin silai leh chema mi a beih chiamnaah mi 38 vel an thi a, a tam zawk hi naupang an ni nghe nghe.
Nong Bua Lamphu province-a pawi a khawih hnuah hian zawn zui nghal niin police chuan amah inthatin a chhungte pawh a that niin an sawi.
Police chuan nursury-a pawikhawihna thlengah hian a titu hian naupang leh puitling thliar lova beiin a kah bakah a vit a, a tlan chhe zui ta niin an sawi.
Kum 34 mi hi police officer hlui niin ruihhlo a tih avangin June thla khan bân a nih thu police chuan an sawi.
A chetna nursery-a zirtirtu pakhat chuan Thailand-a Thairath TV hnenah a fa pawh a hmain a thlah fo thin a, hetiang ti duh awm chi a nih loh thu leh a polite thu a sawi a, hetianga a chet mai chhan hi hriat theih a la ni lo.
Utthai Sawan khuaa thil thlenga thi zinga 22 chu naupang an ni a. |henkhatte phei hi chu kum hnih mi lekte pawh niin an mut laia beih an ni a. Hliam tuar eng emaw zat chu Nong Bua Lamphu district hospital-ah lak an ni hlawm.
“Silai hmet puaktu hi chhun chawlh lai vela kalin childcare centre-a thawktu pali nga vel a kap hmasa,” tiin tual chhung thuneitu, Jidapa Boonsom chuan a sawi a, ani hi thil thlenna bul lawka hna thawk niin Reuters news agency chuan a tar lang a. A kah hmasak zinga pakhat hi zirtirtu, nau thla riat mi pai lai mek a ni nghe nghe.
“A tirah chuan halpuah hal thawm emaw an ti hlawm,” a ti a, hetianga a chet hnuah hian naupangte mutna pindan khalhah chuan a lut tlang lui ta niin a sawi bawk.
Thai Prime Minister Prayuth Chan-ocha chuan naupang sikula inkahna thleng chu ‘thil thleng barakhaihtu’ niin a sawi.
Police chuan a titu hi Panya Kamrab niin an sawi a, a chetna khua thova cheng, ban a nih hmaa police lieutenant colonel thin niin an sawi.
Shotgun, pistol leh chemte a keng a, nursery-ah hian an ram sanaa chhun dar 12:30 (India-a chhun dar 12:00) velah a lut.
A chhunga a chet dan hi hriat vek theih a la ni lo va; mahse, mi a that zawhah hian Toyota pick-up truck kawngka pali nei chi, Bangkok registration plate intar, a varin a tlanchhe zui niin police chuan an sawi a. An zawng zui nghal a, tual chhung mite chu an him nan pawn chhuak lo turin an ti bawk.
Thil thleng hmutute chuan a tlan chhiatnaah hian mi pawh a su thlu nual a, hliam pawh an awm nual niin an sawi.
Police chuan Kamrab-a hi an inah hawin a nupui leh an fa a that a, amah pawh a inthat zui ve nghal niin an sawi bawk.