World Health Organization chuan India-a siam khuh damdawi pali chu tun hnaia Gambia-a naupang 66 zet thihna nen a inzawm nia sawiin heng damdawi laka inveng tura tihna a tichhuak.
Africa khawthlang lam rama naupang thih chhan chhuinaah hian an kal a chhe hlawm nia hmuh a ni a, WHO hian invenna hi a tichhuak zui ta a ni.
Hriselna lam khawihtu pawl hian a siamtu, Maiden Pharmaceuticals leh India thuneitute nen ‘an chhui chhunzawm mek’ tih a sawi bawk.
India-a damdawi viltu (regulator)-te chu heng damdawite hi hralh chhuah titawp rih turin a ti bawk.
India-a health ministry leh drugs regulator chuan WHO-in an website-a product alert an tihchhuah chungchangah hian engmah sawi an la nei ve rih lo.
India sorkar chuan September 29-a alert tihchhuah a nih khan drug regulator-in an chhui zui ve nghal tih an sawi.
Regulator hian WHO hnenah hian ‘thihna thleng chu damdawi siam chhuah nen eng ang taka inzawm nge an nih an hmuh dan’ hrilh ve turin an ti bawk tih an sawi.
WHO-in thihna thleng a chhuinaah an thil hmuhte hi Nilaini khan Director-General Tedros Adhanom Ghebreyesus chuan a puang a, damdawi chi lite hi a sample endik vek a nih thu a sawi a. Heng damdawite hi Promethazine Oral Solution, Kofexmalin Baby Cough Syrup, Makoff Baby Cough Syrup leh Magrip N Cold Syrup an ni.
Hriselna viltu pawl hian laboratory-a an zir chiannaah chuan damdawiah hian diethylene glycol leh ethylene glycol ‘a tam uchuak’ tih hmuh a nih thu a puang a, heng thil pahnih hi mihring tan hlauhawm tak niin in/ei chuan thihna thlen thei a ni.
WHO chuan damdawite hi Gambia-ah hian hman a ni ngei a, hemi piah lamah hian hralh dan pangngai lovin ram dangah pawh sem darh a ni tih an sawi.
“Heng damdawi hi National Regulatory Authority-ten uluk taka an ena an pawm hma chu damdawi him lo a ni rih,” an ti.
Company hian an damdawi hi ‘Gambia-ah bak an thawn chhuak lo’ niin an sawi thung.
Gambia-a medical officer-te chuan July thlaah khan an rama naupang zingah kal lam fel lo an pun avangin mak an tih thu an sawi chhuak tan.
Health Services Director Mustapha Bittaye chuan tun hnaiah thi an pun thu leh heng damdawi palite hi hralh an khap zui thu Reuters news agency hnenah a sawi.
“Khap ni mah se tun thleng hian mi mal damdawi inah chuan tlem azawng hralh erawh an la awm,” a ti bawk.