Zoram Medical College Governing Council chu nimin khan an chairman, Chief Minister Zoramthanga hoin ZMC-ah PG course a la awm theih dan turte an sawi ho.
CM Office Conference Hall-a thutkhawmah hian, damdawi lama thiamna leh inenkawlnain hma a sawn theih nan sorkar laipuiin medical college hrang hrangah a theih chin china PG zirna siam ni se a tih angin, ZMC-ah pawh PG course a la awm theih dan turte sawi ho a. Hei bakah hian, TB & Respiratory Medicine department-a post siam danglam ngai te, staff nurse indaih lohna te, college tihchangtlun belh zelna tura ram zauh belh chungchang te an sawiho a ni.
ZMC Governing Council thukhawm hian Draft ZMC Bye-Laws chhawpchhuah chu an pawm a. Hun kal zelah college chu a lo puitling zelin, inkaihruaina a lo phuisui belh zawk nan mi thiam hrang hrang inrawnkhawma committee dinin bye-laws hi draft a ni.
Thutkhawmah hian Deputy Chief Minister Tawnluia, Health & Family Welfare Minister Dr. R. Lalthangliana, Aizawl South III bialtu MLA Prof. F Lalnunmawia te bakah, H&FW, H&TE, Finance, P&ED, Planning, DP&AR, PWD, PHED leh ZMC hotute bakah MZU leh IMA aiawhte an tel bawk.