Mizoram Youth Commission (MYC) Coaching Centre Champhaia class lak bultanna puala hun hman chu nimin chawhnu khan Health & Family Welfare Board Vice Chairman Dr. ZR Thiamsanga, Champhai North bialtu MLA-in a hmanpui.
Dr. ZR Thiamsanga chuan sorkar hmalakna leh khawtlang tana thahnemngai taka tha thawhtute hmalakna avanga MYC Coaching Centre Champhai kalpui a ni chu lawmawm a tih thu a sawi a. Ramri dep districta awmte tana rualawhna a phuhruk ngei a beisei thu sawiin, zirlaite chu Champhai mai bakah Mizoram leh India ram pum anga mi tangkai leh chhawrnahawm nih tum tura ngaihtuahna seng turin a fuih a. Rualelna chang hriaa an tum leh hmabakte tha taka hlen tum turin a chah a ni.
MYC Coaching Centre Champhai hi June 17 khan MYC Chairman Dr. Vanlaltanpuia’n a hawng a. Hemi hnu hian faculty lak leh bungraw mamawh angte lei niin class lak tan a ni ta a. Thawktu panga, Co-ordinator pakhat, Faculty pathum leh MTS pakhat an awm mek.
General Studies, Mathematics leh English-te zirtir an ni dawn a. A bultan nan seat 30 a awm a, course khat hi thla thum chhung awh tur a ni.
MYC Coaching Centre Champhai atan hian Nursing School Building chhawng chung bera room 3 chu hman lailawk a ni.