Aizawl : Mizoram Presbyterian kohhrana rorelna sangber dawttu Presbytery inkhawmpui chu nimin atang khan Presbytery hrang hrangah tan a ni a, Pathianni zan thleng a awh ang.
Nimin khan nomination committee, finance committee leh sub-pastoral committee te an thu a, kohhran upa thlan tharte exam buatsaih niin, zan lamah palai lawmna inkhawm neiin, pastor bial hrang hrangin report an pe bawk.
Vawiin leh naktukah Presbytery rorel inkhawm neih a ni ang a, zan lamah Pathian biak inkhawm a awm leh ang a, Pathianni chawhma chu Upa nemngheh inkhawm nin, chawhnuah Lalpa zanriah sakramen kilhovin, Upa thi te sunna hun hman a ni ang a, zan inkhawmah Presbytery Moderator kalchhuakin Pathian thuchah a sawi ang.
Presbytery hi Mizoram Synod Puipa ten hmun hrang hrangah an hmanpui a. Moderator Rev. Dr. Vanlalnghaka Ralte-in Tuipuiral Presbytery a hmanpui a. Synod Secretary (Sr.) Rev Z.D Lalhmachhuana’n Chhimtawp Presbytery; Synod Secretary (Jr.) Upa B. Lalhmunliana’n Tuichangral North Presbytery; Sr. Executive Secretary Rev C Zorammawia’n Tuichangral South Presbytery; Executive Secretary Rev. Dr. K. Lallawmzuala’n Khawthlang Presbytery; Finance Officer Rev. V.L Luaia Hranleh-in Tuivawl Presbytery, Finance Officer Rev. P.C Pachhunga’n Chhimphei Presbytery; Statistician Rev. Lalsangbera’n Hmarchhak Presbytery a hmanpui.