Kanye West-a’n Paris Fasion Week-a ‘White Lives Matter’ t-shirt a hak chungchangah Adidas chuan an inremna siam tawh ennawn a tum ta.
Company lam hian he thil sawihlawh tak hi tarlang chiah lo mah se, enliam emaw ngaihthah an tum lo hle niin a sawi theih.
Rapper leh fashion desinger ni bawk Kanye West hian a dinna sawhsawn a tum lo nia tarlan a ni a, Adidas lakah lungawi lovin a design an ru ni awmin a beilet.
BBC tarlan danin, Adidas hian rapper nena an thawhdunna leh hmalakna te ennawn leh a, thutlukna felfai tak siam an tum. German sportswear company thupuangtu chuan, “Adidas Yeezy thawhdunna hi kan industry chanchina thawhhona leh thawhdunna hlawhtling ber pawl a ni,” a ti a. An buaina leh harsatna tarlan erawh a sawi lang lo thung.
Mr Kanyew hian Instagram-ah a tal na chhunzawm hle a, ngawih chuh mai lovin, ‘I AM ADIDAS’ tiin fiah kekkawkin thu a hnutchhiah.
Tarlan tawh angin, Paris Fashion Week neih zawh takah khan, ‘White Lives Matter’ inziahna t-shirt nen a inlan thut a, sawi leh sel a hlawh.
Hun rei tak atang tawhin mihangte nekchepna, hmuhsitna, endawgna leh diriamna nasa mangkheng vangin khawvelin ‘Black Lives Matter’ tih thupui an vawrh sup sup laiin, mihang berin hetia ‘White Lives Matter’ thuziak a rawn thawhchhuahpui ta mai hi mak tih a hlawh a, beihna a tawk zut zut mek a ni..
Social media lamah thu inchuhna, inhnialna leh lamtang insiamna a tam zui hle bawk a, mihang ni si a, mihang nih zahpui a, mingo chungnung zawk nia inhriatna ngaisang a, heti lam hawia a inlan chu temawm tiin, an umzui chiam mai.
Comment pakhatah chuan, “Kanye West-a’n ‘White Lives Matter’ kawr ha tura rilru a siam ta kha a tenawm a, a hlauhawm a, mi dawihzep a nihzia a tilang chian bawk. Lo tantu emaw a th thlavang hautu in awm ve bawk sia, lo inenchiang mawlh teh u,” tih a awm.