- F. Vanlalrochana
TLANGVAL SENIOR TE TAN
Tun hma khan “The Right Guy for the Right Girl + Becoming the Man of her dreams” tih ka chhiar a, a ziaktute hi Jackie Kendall leh Debbie Jones te ziah a ni.
Inngaihzawnna lam thil leh romantic deuh tur emaw inti mai thei a. A ni lo a nia. Pathian thu lam lehkhabu tha tak mai a ni zawk a. Kristian Tlangval tam tak chu nupui an la neih loh avangin an buai a, nupui lam ngaihtuah hun tam tak hmangte an awm a. Pathian rawng an bawlna kawngte pawh chu ngaihzawn chantirtu, nupui hmuloa siamtu angah an ngai hial ta zawk a. Kristian tlangval tam tak hian kawppui an neih mailoh avangin buaina an tawk thin.
Nupui turah hian buai tur a ni lo a. Pathian thuawih a, tha taka A rawng bawl chuan Pathianin a kawppui awmmi tha tak a pe mai dawn a ni. Nupui neih duh lutukna avang hian kan kawppui awm mi nilo neihfo hi a awm thei awm e.
Tlangval lai hi rawngbawl that theih hun lai ber a ni a. Rintlak, inpe, inngaitlawm, taima leh rinawm ni a, hunawla Pathian rawngbawl chuan Pathianin tlangvalte chu nupui duhawm tak a pe dawn a ni. Inneih hnu chuan duhangin kohhran rawngbawlnaah a tel tak tak theih tawh loh , tibuaitu a tam tih lam hi he lehkhabu hian a ziah ber chu a ni a.
Kristian tlangval quality 10: Man of reckless abandonment, Man of diligence, Man of faith, Man of virtue, Man of devotion, man of purity, man of security, man of contenment, man of conviction, man of patience a sawi a. Heng hi bungtinah a sawi chiangin a tarlang chiang vek a ni.
Single lai hi rawngbawlna hun tha kan neih lai a ni a. single rei deuh tawh vanga rawngbawlna ngaihthah deuha nupui zawn te hi a tha lo. Thahnemngai taka rawngbawl tlauh tlauh tur a ni. Phu tawka the ber Pathianin a rawn chhawpchhuak nawlh mai ang he lehkhabu hian a ti a ni ber.
FOLLOW…
Kan aia hnam rilru dahlau zawka kan ngaihte hian, ramri kham chin an nei a. Mihringin a khawsak dan tura limit awm chin hi an hrethiam thin.
Engvang pawhin mi hi lo lar se, vantlang pawm theih loh thila an hming chhiat chuan, an eizawnnain a tuar a. An hming chhiat phah a. Social Media-a follower an neihte a tlahniam nasa a. Ngaihthah an hlawh zui thin.
Keini hnam hi eng kan ti ta nge ka hre lo, vantlang pawm theih loh zawnga khawsa, an thlalak leh video darh te hian social mediaah follower an han nei pung zawk hlauh a. Sualna emaw, thil dik lo emaw, thil awm ang lote hi kan lo haw vak lo a, kan lo ngaimawh vak lo-Hmuhnawm kan lo ti a nih hi. Mi nun khaw lo emaw,che chhia e, nun dan tur baka nungte hi hmuhnawm thlirin kan thlir a. Engkim hi entertainment emaw kan ti a, kan khawtlang nun hi soap opera emaw tiin kan hmu Santa Barbara, kan hmu The Bold and the Beuatiful, kan hmu kasauti, kan hmu korean serial zo vek a nih hi!
Tlang Rokhuma hian follow series hi a ziak a. A painting pakhat chu min pe ve nghe nghe a. Mizote hian thil tak tak, mi tak tak ngaihvenin i follow ila. Chumi baka kan thalaite hruai sual theitute hi chu i ‘Ignore’ teh ang u.
Naupang zawkte hmuha chhawp chhuah tur hi uluk ila, entawn tlak inkawhhmuh ila. ‘Role model’ tha follow teh ang u.
DRAMA
Drama chu chan (performed) tur a ni a. Hei hi drama ziah dawn reng rengin innghahna thuthlung pawimawh ber a ni tur a ni ang.
Mizo drama a bua chhuak engemaw zat hi chu stage-a chan ngaihna a awm miah lo! Novel chi khat, inbiakna (dialogue) hmangin an ziak a ni ber mai e. A taima fal tan lo chuan, chhiar peih chi pawh a ni lo. Mizo drama bu chhiar chhuak thlap thlap chu mi tlêmte an ni ang.
Tun laia stage drama tam tak kan hmuh hi, a zira zir chian tlak lem loh, a bua dah nise chhiar tlak lem loh tur a ni fur bawkin a lang.
Drama lama hma kan sawn loh êm êm chhan hi chu, channa tur hun leh hmun a awm thin lo. Channa tur awm si loa miin thahnemngaihna avanga drama a ziah chuan, ziah fuh loh tawk a nei fo ang. Drama kalphung hre vak loa a ziah avangte pawh a ni ve thei bawk ang. Chang nghal tura lo nghak an awm lo a nih pawhin, stage a chan tur anga mitthla chungin drama ziak sela, a ziak sual lo tlangpui ang.
SUMHMUN POETRY
Tuipui thiang chamdel chunga
Lawngmi khawhar hi;
Zantiang thangvan zauva
Chhawrthla eng leh siar te khian
A kalna an zui zel a.
Tuipui kam hmun hring dela,
I lenna hmunah;
Sirva zai mawi leh hnahchhawl hring del te nen.
Hlimna hla in saknaah;
Lunglen hneha tual i chainan,
I hnen a rawn pan.
Turnipui khian chhuah zai rel lovin,
Leilung virlai hi tawp sela;
Pangparte’n mawi chhuah lovin,
Luipui tuite lo kang se;
Thlaler ram rovah kawng bovin,
Hringnun hian hnuchhawn che mah se,
lawngmi khawhar hian
A rawn pan zel ang che,
Hmangaihna angchhunga awm a,
Hlima in nuih dun ve nan.
Tuipui zauva lawngmi khawhar hian,
Thangvan hmar arsi a nei;
Nun khawhara suihlung leng hi;
Nun malsawmin chhungkhat ang che.
Tuipui thiang chamdel chunga
Lawngmi khawhar hi;
Lunglen hneha tual a chainan
I hnen a rawn pan.
(2006 khan lecture ka ngaithla ning lutukin he poem hi ka thai ve ringawt…Chhun pachangah…)