Indian sorkar chuan World Health Organization (WHO)-in tun hnaia Gambia rama naupang 66 lai thihna nena inkaihhnawihna nei khuh damdawi pali chhui chianna tur thupek chhuahin chhui mek a ni.
WHO hian naupangte hi an kal lam tha lo avangin an thi niin a sawi a. Maiden Pharmaceuticals-in an siam damdawi paliah hian mihring tana tha lo thil a tel tur zat aia tam fe a tel niin an sawi bawk.
India-a damdawi lam viltu, regulator-te chu heng damdawi hralh chhuah titawp turin a ti nghal bawk.
Maiden Pharmaceuticals hian WHO-in a puhna chungchangah hian engmah sawi an la nei lo.
India-a national drug regulator pawhin September 29-a hemi chungchangah hian WHO-in a biakpawh hnuah an chhui ve nghal niin sorkar thuchhuah chuan a tar lang.
Regulator-in thu an chhuahah chuan WHO hnenah hian an lo chhui tawhnaa ‘thihna thlen chhan hi damdawi hman vang’ nia an hmuh chu entira hrilh ve turin an ngen bawk tih an sawi.
WHO-in Gambia-a naupang thihna thleng a chhuinaa an thil hmuh hi Nilaini khan Director-General Tedros Adhanom Ghebreyesus chuan a puang a, khuh damdawi palite hi an sample la vekin an endik niin a sawi a. Damdawite hi Promethazine Oral Solution, Kofexmalin Baby Cough Syrup, Makoff Baby Cough Syrup leh Magrip N Cold Syrup a nih thu a sawi bawk.
Khawvel huap hriselna lam changtu pawl hian laboratory-a an enah chuan heng damdawiah hian mihring tana tûr hlauhawm tak, ei/in palh chuan thihna thlen thei, diethylene glycol leh ethylene glycol chu a tel tur zat aia tam fe a lo tel niin an hmu a ni.
WHO chuang heng damdawite hi Gambia-ah hian an hmang ngei tih pawh an hriatpui thu leh ram dangah pawh hralh leh inthawn dan pangngai ni lem lova zawrh chhuah a awm bawk tih an hria tih a sawi.
Hetih lai hian Indian sorkar chuan khuh damdawi palite hi ‘Gambia-ah chauh an thawn chhuak’ niin an sawi ve thung.
Hriselna changtu pawl hian ‘a siamtu leh Indian thuneitute nen’ an chhui zui mek zel niin a sawi bawk.
“Heng damdawi hi National Regulatory Authority-ten a him tawk an tih hma chu tun dinhmunah chuan a him rih lo a ni,” tiin an sawi bawk.
Gambia-a medical officer-te hian July thla khan naupang kal tha lo an pun thu sawiin an mangan thu an sawi chhuak tan.
Health Services Director Mustapha Bittaye, chuan tun hnaiah thi an pun thu leh an ramah heng damdawi pali hi hralh an khap rih tak thu Reuters news agency a hrilh.
“Hetih rual hian mi mal damdawi in leh inentirnaah chuan hralh an la awm tho,” tiin a sawi.