India-a police-te chuan sikul naupang hmeichhia kum 11 mi chu an sikula amah aia pawl sang zirlai dang pahnihin sikul inthiarna pindanah an pawngsual rawn nia sawi awm chu an chhui mek.
Zirna ina pawngsualna thleng nia sawi hi July thlaa mi daih tawh kha a ni a; mahse, Delhi Commission for Women (DCW)-in Ningania an sawi chhuah atang chauhva hriat a ni.
DCW hian he thil thleng nia sawi chhuinaah hian sikul thuneitute pawh inrawlha chhuina pui turin an ngen.
Police chuan thubuai an ziak lut tawh a, man erawh tumah an la nei lo.
Nilainia DCW Chairperson Swati Maliwal-i’n thuchhuah a siamah hmeichhe naupang luhna hi Delhi-a sorkar enkawl sikul a ni a. July thla khan an classroom-ah mipa naupang pahnih, an sikul thova high school zirlai pahnih a su niin a tar lang.
Hmeichhe naupang hian ngaihdam a dil a; mahse, mipate hian chhaih nawmnah zuiin inthiarna pindanah an hruai lut lui a, kawngka kalhin an pawngsual ta niin a tar lang.
Maliwal-i hian hmeichhe naupangin a sawi dan chuan sikul thuneitute pawhin a thil tawn chu thupsak an tum a ni.
Hmeichhe naupang hian an zirtirtu hnena a chunga thil thleng chu a hrilh a; mahse, zirtirtu hian ‘mipa naupangte hi hnawh chhuah an ni dawn asin’ tiin a khap bet zui niin DCW chairperson hian a sawi a ni.
“Kan khawpuiah sikul pawh naupangte tan a him lo lehzel hi a vanduaithlak tak zet,” a ti.
Sikul thuneituten thil thleng an thup nia sawi pawh hi chhui zuia ‘sikul zirtirtu leh thawktu dang, lo hre ve dangte’ chungah police-in an tih tur an tih ngei a ngaih thu a sawi.
Sikul hi chuan a chunga thil thleng hi hmeichhe naupang hian principal bulah a thlen lo niin an sawi a; mahse, chhui zui a ni dawn tho.
Police chuan Protection of Children from Sexual Offences (Pocso) Act hmanga thubuai an ziah thu leh an chhui thu an sawi bawk.
Zirtirtute leh pawngsualtu nia puhte hi thu an zawh vel mek niin an sawi bawk.