India-in a awp chin Kashmir-ah sikula zirtirtu pahnih chu mi tu an nih hriat lohten an kap hlum a, tun hnaiah helai hmunah hian civil thah an tam ta hle niin police chuan an sawi.
Thuneitute chuan India do reng renga hel pawlte tih niin an chhal a, Srinagar daiah zirtirtute hi an thah niin Ningani khan an sawi.
Police-te chuan Srinagar-a Eidgah venga Government Boys Higher Secondary School-a thawk zirtirtu hmeichhia leh mipa chu mi sualte hian hnai takah an kap a, an tlanchhe zui nghal niin an sawi.
A hmunah hian an thi ve ve niin police chuan an sawi a. Sorkar miten a hmun hi tuma tlawhpawh theih loh tura kharin a titute hnu hi an chhui zui nghal.
Thi pahnihte hi helai bawra sakhaw zuitu tlem, Hindu leh Sikh an ni.
Himalayan tlangdunga awm, Kashmir hi India leh Pakistan-in an inawp sem a ni a, an pahnih hnih hian an ta vek niin an chhal ve ve a, an intibuai reng.
India-in an awp chin Kashmir-ah hian kum 1989 atang khan helho chuan New Delhi hi an do ngar ngar a. A mi cheng tam ber hi Muslim Kashmiri niin helho hi an thlawp a, Muslim ram, Pakistan-a awmho vek emaw, ram hran anga din an duh a ni.