Line of Actual Control-a innghirnghonaah thil lawmawm lam awm mah se India leh China inkar chu ‘a pangngai’ a la ni thei lo niin India-a external affairs ministry chuan a sawi.
Zirtawpnia foreign ministry thupuangtu, Arindam Bagchi-a’n Delhi-a thuthar lakhawmtute a kawmnaah, “Thil pangngai ang chiah chu a la ni lo va. Thil lawmawm lam chu a awm ve zel a; mahse, hun erawh a la ngai deuh dawn,” a ti.
India leh China hian helai bawra an inep nat zualna lai hmuna an sipai dahte chu thla hmasa khan an hnuk kir ve ve tawh tih defence ministry chuan a sawi.
Ram pahnihte hian sipai lalte inbiak thawh 16-naah ‘Gogra-Hot Springs-a sipai awmte hnuhkir chu an remti’ niin thuchhuahah tar lan a ni.
Ladakh-a ramria intihbuainaah hian ‘muanawm leh thil lawmawm lam a awm zel’ niin a tar lang bawk.
Ladakh-a hmun sang takah hian kum 2020 khan ram pahnih sipaite hi kutlawnga inbeiin Indian sipai 20 leh Chinese sipai pali an thi a, hemi hnu atang hian ram pahnih hian sipai tam tak an chhawp a, liantham takin an inep ut reng a ni.