Easter Island-a lung sakhata siam milim hrawl tak tak chu tun hnaiah kangmeiin nasa takin a tichhia a, thenkhat phei chu thawm that theih chi pawh an ni tawh lo.
Chile-a cultural heritage undersecretary chuan lunga chher milim maksak tak takte hi kangmeiin a tichhe nasa tih a sawi.
Easter Island hi hetiang hmanlai miten an siam thil mak tak tak 1,000 dawn awmna a ni a, moai tia sawi mai thin a ni a. Milimte hi lu lian tak taka siam niin metre 4 vela sang an ni hlawm.
Polynesian tribe-in kum 500 chuang kal tawha an chher nia ngaih a ni.
Kangmei hi Thawhtannia chhuak niin ‘ram hectare 60 dawn a kang’ niin cultural heritage thuneitu, Carolina Perez Dattari chuan Twitter-ah a tar lang.
Easter Island laili, Rano Raraku volcano an tih bul vel, Unesco World Heritage Site a ni.
Easter Island hi Chile vaukam atanga km 3,500 vela hlaa awm a ni a. Khualzin hiptu niin Covid-19 avanga rei tak khar a nih hnuah thla thum kal ta khan an hawng leh chauh va. Chhiatna a thlen leh takah hian endik chhung khar leh rih a ni dawn.
Thliarkar Mayor Pedro Edmunds chuan tual chhung chanchinbute hnenah, “Meiin a tihchhiatte hi chu tihthat rual a ni tawh lo,” a ti.
Ma’u Henua community director chuan national park-a chhiatna thleng chu ‘siam that leh rual loh, kan hmuh atana awihawm loh khawp a ni’ tiin a sawi.
“Moai-te hi an kang char vek a ni,” tiin Ariki Tepano chuan park official social media page-ah a tar lang a ni.
Easter Island-a milim siam leh ker lian tak tak 1,000 vel zinga a lian ber chu tonne 74-a rit, metre 10-a sang a ni.
Kum 1400 leh 1650 inkar vela Rapa Nui miten an siam nia rin niin thliarkar hma lamah a kuala tun a ni.
Mit leh beng sei tak an nei a, lung dang hmangin an lukhum ni awm tak siamsak an ni bawk.
Rapa Nui-te hian thlarau lam thila an biak thin a nih rinna a awm a. Pakhat zelin mi pakhat piang nawn leh anga chhiar a ni.
Milim zinga pakhat, Hoa Hakananai’a chu British Museum-ah British naval captain-in Queen Victoria hnena a pek avangin dah a ni.
Chilean sorkar leh thliarkar thuneitute chuan kum 2018 khan pek let leh an dil a; mahse, thliarkar mayor moai enkawlna tur sum hi thliarkar tan a hautak tho avangin tul a ti lo nia sawi a ni.