Mizoram Pradesh Congress Committee (MPCC) elected office bearer-ten khawchhak tlangdung fan programme an neih chu nimin khan hlawhtling takin an zo fel.
October 4-7, 2022 chhung khan khawchhak tlangdung fan programme neiin, MPCC Elected Office Bearer pathum – Lalsawta, President, Lal Thanzara, Vice President leh Zodintluanga Ralte, MLA & Treasurer, MPCC te bakah Aizawl atangin party hruaitu eng emaw zat an tel a ni.
Khawchhak tlangdung fehchhuah programme an neih zawh takah hian district pathum – Saitual, Khawzawl leh Champhai district tlawhin, heng hunah hian Congress party hian tun hnaia an party election manifesto pakhatna an tlangzarh tak an puanzar thin bakah an zir hoin, party hruaituten thu an sawi bawk.
Lal Thanhawla a chawlh hnua MPCC Office Bearer tharten Mizoram a district hrang hrang 11 an tlawh chhuah hmasak ber a ni.
Hetih laiin Saitual programme a tel, ADCC Organiser Lalrinawma, Armed Veng, motor accident-a a boral chu pawi an tih thu leh an ui takzet a, a vui ni pawhin Congress Bhavan kharin, a chuanpui hliam tuar zawng zawngte pawh tha chhuak leh thuai turin duhsakna an hlan bawk.