Aizawl : Women’s Polytechnic Aizawl-in nimin khan zirlai thar lawmluhna leh College week kharna hun an hmang a, Higher & Technical Education Minister Dr. R. Lalthangliana’n a hmanpui.
H&TE Minister Dr R Lalthangliana chuan Women’s Polytechnic-in inzirtirna kawngah saptawng an hmang uar chu tha a tih thu sawiin, “Mahni tawng kan ngaihpawimawh rualin tunlai khawvelah a bikin phai lama hna thawh dawnin saptawng thiam a pawimawh a, tawng kan thiam chuan tawng vanga ramri kham communication barrier hi kan paltlang thei a, hei hian nasa takin hnathawhna lamah puiin a tihawlsam phah thin a ni”, a ti.
Women’s Polytechnic atanga zirchhuak zirlai 1000 chuang an awm tawh thu sawiin, “A then te chu private sector lamah hna tha tak tak nei te an ni tawh a, skill based education chu a pawimawh chho zel dawn,” a ti a; “chuvangin he zirna in hi pawimawh tlak a ni a, a bik takin employment generate-na leh hnathawh tur kawng inkawhhmuhna lamah an thawhhlawk hle” a ti bawk.
Women’s Polytechnic hi kum 1998 ah ding tanin Course pali – Modern office management & practice (MOMP); Garment technology (GT); Electronics & telecommunications (ET) leh Beauty culture & cosmetology (BCC)-ah te kum thum Diploma course an nei mek a. Tunah hian zirlai 227 leh zirtirtu 27 leh thawktu dang 31 an awm mek a ni.