Aizawl : Mizo Students’ Union (MSU)-in Ningani khan Vanapa hall Aizawl-ah General conference hmangin, hruaitu thar an thlang nghal a. MSU khawmpui hi Minister of state Robert Romawia Royte-in a hmanpui bawk.
MSU thuchhuahin a tarlan danin, tuntuma MSU hruaitu thlanah hian Samuel Zoram- thanpuia line-up chu khingtu nei lovin tlinga puan an ni a. MSU hruaitu thar tur te chu – President Samuel Zoramthanpuia; Vice President Laldinsanga; General Secretary Lalramhluna Fanai; Asst. General Secretary Samuel Lalruatdika; Treasurer Zodinsanga leh Fin. Secretary Lalrampanmawia te an ni.
MSU inkhawmpui hian MLA inthlanah Mizo zirlai state pawna awm ten vote an thlak theihna tura hmalak rawtna a pawm a, Election commission of India leh Mizoram sorkarah hemi chungchang hi thlen an tum.
8th schedule-a Mizo tawng dah a nih theihna tura hmalak rawtna an pawm a. State sorkar hnuaia college admission fee atanga sorkarin revenue a lak thin tihtawp a nih theihna tura hmalak rawtna pawh pawmin, Mizorama public sector undertaking hnuaia hna hrang hrang laknaah State level language proficiency test board din tura hmalak rawtna leh an pawl dan bu ennawn rawtna an pawm bawk.