Russia chuan Inrinnia Crimea nena an inkalpawhna awm chhun leia thil na tak puak a awm hnuah venhimna khauh takin a kalpui thar.
President Vladimir Putin chuan an rama Federal Security Service (FSB) chu an awp peninsula nena an inkalpawhna chu uluk lehzuala veng tura tihna thupek a pe.
Lei tihchhiat tak hi Russia-in kum 2014-a Ukraine ram chin, Crimea a luah lantirna langsar ber a ni a. He thil puakah hian mi pathum an thi niin Russian chhuitute chuan an sawi a ni.
Lei chhe lai siam tha turin thawktuten hna an tan mawlh mawlh tih thuneitute chuan an sawi bawk.
Russian deputy prime minister chuan lei chhe lai bik hi rang taka thiah darh turin thu a pe a, a hnuai tuipuia thil tla lutte pawh la chhuak turin tui lut thiamte chu Pathianni tuk khan zir chiang turin an luhtir nghal tih Russian news agency-te chuan an tar lang.
Russian chanchinbuten ‘construction of the century’ tia an sawi, he lei hi Russia-in a thenawm ram a rûn mekah hian Ukraine chhim lama sipai hmanrua, an ralthuam leh sipaite a thiar kual leh thawn lutna kawng ber a ni.
Inrinnia thlalem atanga thlalak tihchhuahah chuan km 19-a sei lei, Moscow-in Crimea a luah atanga kum lia hawnah hian nasa takin kangmei a chhuak a, a chhe nual bawk tih hmuh theih a ni.
Tuna indona a chhuah hnuah Russia-in tangkai taka an hman zui atangin Ukrainian thuneituten an bitum ber pakhat a ni zui a, hetih rual hian peninsula hi an thununna hnuaia dah let ngei an tum bawk.
Ukrainian thuneitute chuan lei beihna hi lawmawm tih lam hawiin an sawi zui a; mahse, an sipaite tih a ni ngei tih erawh engmah an sawi chiang lo thung.
President Volodymyr Zelensky chuan Inrinni zana thuchah a sawiah, “Vawiin hi kan tan ni tha lo a ni lo va, kan ram chinah chuan ni a sa tha hle a ni,” a ti.
“Vanduaithlak takin Crimea-ah chuan chhum a zing a, chutih rualin a lum hle bawk,” a ti.