Sorkar laipui chuan August, 2019-a Danpui hmanga Jammu & Kashmir hung bikna, Article 370 hlih a nih hnuah tharum thawhna nasa takin a tlahniam niin a sawi a. Union Territory-ah hian kum 2019 aiin 2020-ah firfiak chetna pawh a tlem zawk niin a sawi bawk.
Union Minister of State for Home G Kishan Reddy chuan nimina Lok Sabha inkhawmah kum 2020-ah khan Jammu & Kashmir-ah firfiak chetna vawi 244 a thlen laiin kum hmasa, 2019-ah kha chuan 594 lai a thleng niin a sawi a. Kum 2020-ah khan firfiak mi 221 thah a nih laiin 2019-ah 157 chauh thah an ni thung niin a sawi bawk.
Ziaka zawhna a chhannaah minister chuan kumin February thleng khan Union Territory-ah hian firfiak chetna vawi 15 thlengin firfiak pariat thah an ni tawh tih a tar lang bawk.
Minister chuan kum 2020-ah khan venhim hnathawktu 33 leh civil mi paruk thah an ni tih a sawi a. Kum 2019 khan venhim hna thawktu 27 leh civil mi panga thah an ni tih a sawi bawk.
“Article 370 hlih a nih hnuah khan Jammu & Kashmir-ah hian nasa takin firfiakte chetna a tlahniam a ni,” a ti.
Reddy hian firfiak chetna thlen miah loh a duh tih sawiin chumi tur chuan hma hrang hrang a la tih a sawi a. Venhim hnathawktute a tichak a, ram do zawnga chete beih letna a tichakin dan leh thupek khauh zawka kenkawh a ni a, hmun kharhnana mi sual dah chhuah beihpui pawh nasa zawka thlak a nih thu a sawi.