Tamil Nadu-a ran vultu pakhat chu a kel vulh lai lo chungchanga inhnial buaina thleng avangin kah hlum a ni.
Mettupalayam district-a ran vulhtu, kum 58 mi hi a kel eng emaw zat a bo va, a rutu nia a rinhlelh zinga mi nen an intihbuainaah rinhlelh hian Pathianni zing lam khan a kap hlum a ni.
Police-in an sawi dan chuan Chinnasami-a huan, Mandharaikkadu bula mi atangin Inrinni tlai khan kel a bo nual a, police hnenah pawh a ran bo hi a thlen nghe nghe.
A chhungte zinga pakhat chuan kum 28 mi, Ranjit Kumar-a chu a ru botu zingah puhin khuaa hralh thinah a puh a ni.
Chinnasami-a hian an in bula Ranjit-a kal a lo nang fuh chu a kel bo chungchang lo sawipuiin ru-ah a puh a, an inhnial a. Ranjit-a chuan a kel engmah a ruk loh thu a sawi a, Chinnasamy-a thinrim hian kut pawh a thlak nghe nghe.
Ranjit-a chu a kal bo va, Inrinni zan zan lai, Pathianni zing lamah tualchher silai nena thawk chhuakin Chinnasami-a in hi a pan a, a kap ta a, a hmunah hian a thi nghal niin police chuan an sawi.
An khaw miten police hrilh nghalin anni pawh an thleng nghal a. Ranjit Kumar-a pawh manin a silai pawh an laksak a, thil awm dan an chhui zui nghal mek a ni.