Aizawl: Union Home Minister Amit Shah kaihhruaiin hmarchhak state pariata chief minister, chief secretary leh DGP ten ruihhlo tawlhruk leh a dona kawnga hmalakna tur an sawi ho.
Inrinni khan Assam khawpui, Guwahati-ah ruihhlo tawlhruk leh ram chhung venhimna ‘Drugs Trafficking & National Security’ chungchang sawiho a ni a. Kaihruaitu Shah chuan sorkar laipuiin ruihhlo tawlhruk a veiin a zung atanga tihtawp a nih theih nan thapui chhuaha tun aia chak leh khauh zawka hma la turin hmarchhak state-te thawhpui a duh thu a sawi.
Shah chuan, “Ruihhlo tawlhruk chu ramri kham nei lo dan bawhchhiatna a nih avangin drugs enforcement leh intelligence agency-te an thawhho a tul bakah hmarchhaka ramri hrula awm district-te nen pawh hmalak ho a tul,” a ti.
Hmarchhakah ruihhlo hman sual a nasat thu sawiin, “Hmarchhakah hian ram dang pali ramri tawmpui kan nei a, Myanmar phei chu Afghanistan dawta khawvela opium siam chhuak hnem ber a ni,” a ti a. Tun hnaia ruihhlo tawlhtuten hmarchhak mite address leh bank account thiam takin an hawh thin bakah tun hmaa an la tih ngai lo thil thar an tih hmuhchhuah a nih thu a sawi a. Ruihhlo hi ram pum issue a nih avangin ram pum huapa hmalak a tul niin a sawi.
Home minister hian hmarchhak state-te chu ruihhlo tawlhruk dona kawnga NCORD portal leh NIDAB platform hmang tangkai tur leh state tina din Anti Narcotics Task Force te thuam chak turin a chah.
He thutkhawma tel, Chief Minister Zoramthanga pawhin ruihhlo tawlhrukna chu chak zawka do a nih thei nana hma lakna hrang hrang kalpui mekte a tar lang a. Ramri venhimnaa thil pawimawh leh tulte a sawi bawk a ni.
Thutkhawma tar lan a nih danin kum 2006-13 chhungin ruihhlo tawlh thubuai 1,257 ziah luh a ni a, a kaihhnawihah mi 1,362 man an ni.
Thubuai ziah luh hi kum 2014-22 chhungin za zelah 152-ah pungin thubuai 3,172 ziah luh a ni a, hemi hun chhungin mi 4,888 man an ni.
Kum 2006-13 chhungin ruihhlo kg nuai 1.52 man niin 2014-22 chhungin a letin a pung a, kg nuai 3.30-ah a pung a. Kum 2006-13 chhungin Rs. vaibelchhe 768 hu man niin, kum 2014-22 chhungin a let 25ah pungin hemi hun chhungin ruihhlo Rs. vaibelchhe 20,000 hu man a ni.