Aizawl : PC party-in tunhnaia Mizorama lo zin Australia Senator Dean Smith-a’n Mizoram Larsap Hari Kambhampati hnena Myanmar raltlante ṭha taka lo enkawl tura Mizoram sorkar a ngenna zahawm an tih thu leh chhuanawm an tih thu an sawi a. “Chief Minister Zoramthanga’n inthinharh nan hmang thei se kan duh hle” an ti.
“Australia sorkarin an rama Zohnahthlak tam tak awmte a ngaihsak ang bawka Mizoram sorkar pawhin theihtawp chhuaha lo ngaihsak tura Australia Senator-in a beiseina hi hlawhtling taka hlenchhuah a nih theih nan kan unau raltlante official refugee a pawm an nih ngei theih nan a rang thei ang bera chak taka hma la turin PC Party chuan Chief Minister Zoramthanga kan ngen” an ti bawk.