Chief Minister Zoramthanga’n nimin khan Champhai Winery a tlawh a, grape wine hralhna tur chungchangah project mumal tak siama Delhi tlang thlenga hma an lak tur thu a sawi.
Chief minister chuan winery chu a bultantu an nih thu sawiin, grape chingtute hma ngaiin an sorkar hmasak atang tawha hma an lak thu leh harsatna siam zawng leh a tibuai zawnga kalpui an duh loh thu a sawi a. An sum puk Rs. nuai 83 chuang pawh rulh ngai lovin an lo inngaidam tawh tih a sawi.
Tunah chuan Mizoramin grape a tharte atanga siam chhuah grape wine chu dan ang thlapa kalpui a nih tawh thu sawiin, chief minister chuan, “Political party hrang hrangte remtihnaa hming sign thlapin grape wine rules hi a lo piang chhuak ta a ni,” a ti a; wine rate tur chu ngaihtuah mek a nih thu a sawi.
Grape wine hralhna chungchangah chuan project mumal tak siama hma an lak tur thu te, a sawngbawlna leh market intervention chungchangah te, hma la turin planning department lam pawhin an buaipui theih thu te a sawi.
Champhai Grape Growers’ Society hruaitute chuan The Mizoram Grape Wine Rules, 2022 siam a nih tak avangin chief minister hnenah lawmthu an hrilh a. Hri len lai leh dan ang taka grape wine hralh phalna siam a nih hmaa an harsatna tawhte chief minister hnenah hian lo thlenin grape chauh ni lo, Mizoram thlai thar – lakhuihthei, theite, dragon fruit leh thei dangte thleng pawha sawngbawla uluk leh zau zawka mipuite chhawr tangkai theih tura hmalaksak turin an ngen nghal bawk.
Winery din tirh atanga tun thlengin winery-ah hian grape sawr tur quintal 15,218 an lei tling tawh niin Champhai Grape Growers’ Society hruaitute chuan sawiin, hemi atan hian Rs. 5,78,41,160 an seng tawh niin an sawi a. Kumin bikah quintal 1,144.98 lei tling tawhin, an grape lakte chu herin a umna zemah an dah fel tawh niin an sawi bawk.