Vanapa Hall bathlarah lehkhabu sang tel a duh apiang tana lei theih turin phochhuah mek a ni a, ‘Lehkhabu Pho Rûnpui’ pantu zingah thalai aiin kum upa an tam zawk.
Mizorama ziaktu lar tak takte, ziaktu tharlâmte ziah lehkhabu pho chhuahna hmun hi pantu an thahnem thei hle a, zing dar 10 atanga tlai dar 5 thlengin lehkhabu lei turte an insul pel zut zut reng a ni.
Ziak mite chawisanna tura buatsaih, ‘Lehkhabu Pho Rûnpui’ pantu zingah hian kum 40 hnuai lam aiin, kum 50 ral kai tawhte hmuh tur an tam zawk a. Leikhabu zuartu nula pakhat pawhin, “Min rawn dawrtu zinga a tam zawk hi chu kum upa lam deuh vek an ni a, thalai hi an tam vak lo,” tiin The Zozam Times a hrilh.
|halai zawkten ‘Lehkhabu Pho Rûnpui’ hi an ngaihlu lo a tih theih chuang lo a, The Zozam Times-in a tlawh lai pawhin kum 18 hnuai lam, naupang leh kum 20 bawr chho tleirawl leh rawlthar hmuh tur tam tak an awm tho.
Lehkhabu pho chhuak zingah pawh kum 40 hnuai lam thalai ziaktu lar an awm fur a, lehkhabu hralh kal berte zinga mi pawh PC Lalremruati (Mapuii Pachuau) ziah, ‘I ti thei’ tih a ni a; ani hi kum 40 hnuai lam, thalai tih huanga khung len ngei tur chanchinthar puang thin a ni.
Mipuiin lehkhabu chhiar an uar leh theih nana ‘Lehkhabu Pho Rûnpui’ buatsaihtute hi Mizo Writers’ Association (MWA) an ni a, an president R Lallianzuala chuan a ni khatnaah lehkhabu Rs nuai hnih dawn thuak man an hralh tih The Zozam Times a hrilh.
R Lallianzuala chuan an hmalakna hian tum hrang hrang an nei a, mipuiin lehkhabu chhiar uar leh se tih te, ziak mite hamthatna tur te, ziak mi thar cho chhuahte a nih thu a sawi a, “Lehkhabu ziah hi intihhmuh phah nan hmang ila kan duh hle,” a ti.
Lehkhabu zuartute hi mi hrang hrang an awm a, ziaktu hrang hrangin lehkhabu an theh khawm chu MWA lamin a zuartu ruaiin an zuar a, publication hrang hrangin stall hran neiin an pho chhuak a, ziaktu lar leh senior-ten anmahni pualin stall an nei a, an lehkhabu ziah leh an lo publish tawhte an pho chhuak.
Lehkhabu Pho Rûnpui hi Thawhlehni khan neih tan a ni a, Zirtawpni thleng a awh dawn a. Mizo irawm chhuak lehkhabu leh hnam dang lehkhabu Mizo tawnga lehlin chi hrang hrangte pho chhuah a ni.