World Cup vawi thum ngawt khel lo zawn tawh, Italy chuan an ram team siam that tumin Pep Guardiola an dawr a, Italian Football Federation President Giovanni Malago-a chuan Manchester City coach chhuak hlim hi an dawr ngei thu a tichiang.
Pep hian City-ah kum 10 hun a hman chhungin Premier League nomawi paruk, FA Cup pathum, League Cup panga leh Champions League nomawi a lakpui a, English football-a coach hlawhtling ber pawl a ni.
Italy hian April thlaa Gennaro Gattuso-a’n a hna a bânsan hnuah a thlaktu tur coach an la nei lo a, Guardiola an lak luh dawn chuan hlawhah an insen huai erawh a ngai dawn thung.
Malago-a chuan, “A hlawh chungchangah hi chuan mi dang ang a ni thei lo tih kan chiang,” a ti a, Guordiola an chang thei dawn a nih chuan sum sen an inhreh lo hle niin a lang.
Hetihlai hian Italy hian an coach hlui, Roberto Mancini leh an ram legend Andrea Pirlo te pawh an ngaihven tho a, Malago-a chuan, “Anni chauh kan ngaihtuah lo va, coach dang pawh kan ngaihven tho,” a ti a, uluk taka coach tur an zawn thu a sawi.
Guordiola hian Italy-ah coach hna la thawk lo mah se, 2001-2003 inkar kha player a nih laiin Serie A-ah hun a lo hmang tawh a, Brescia leh AS Roma tan khel tawhin, Italian tawng a thiam.
Barcelona leh Bayern Munich boss hlui hian, “Ka chau takzet a ni,” tiin City a chhuahsan dawn khan a sawi a, Italy erawh national team a nih avangin club football ai chuan a hahdam dawn.
Premier League-a Guordiola elpui ber thin, Jurgen Klopp-a chuan an ram team, Germany a enkawl dawn nia sawi a ni a, Guordiola-a’n Italy a enkawl bawk chuan UEFA Nations League thlengin boruak a nung thar thei ang.