Zirtawpni hian Young Mizo Association (YMA) Rorel Inkhawm vawi 3-na chu Thingsulthliah khelmualah neih a ni dawn.
Rorel inkhawm hi chawhma dar 10:30 atanga tanin tlai dar 4 thleng neih a ni dawn a. Central YMA President R Lalngheta’n a kaihruai ang.
Kumin YMA Rorel Inkhawmah hian YMA khawih agenda 10 awmin, chung zingah chuan YMA General Conference tih thin chu ‘YMA Inkhawmpui Lian’ tia hming thlak rawtna te, eirukna leh hlemhletna a reh theih an Central YMA-in tun aia chak zawkin hma la rawh se tih te, hnam dang inhmun/huan/lo/ram lei leh hralh/hlanchhawn zel a nih loh nan Mizoram chhunga inhmun/huan/lo/ram hralh leh hlanchhawn a nih dawnin YMA hriatpuina tel zel a nih theihnan CYMA-in chak takin hma lak rawtna te a tel a ni.
Sorkar khawi agenda hi pali awmin Mizoramin market regulation a neih theih nan hmalak rawtna te, Myanmar atanga raltlante, hmun hrang hranga awm darh hian harsatna lian zawk a la thlen thei dawna a lan avangin sorkarin relief camp changtlung zawk siam tur leh chumiah chuan dah vek tura hmalak turin sorkar lamah Central YMA-in hma lak rawtte a tel bawk.
Kumin YMA Rorel Inkhawm hi Zawlbuk Group YMA-in an thleng a. Zan dar 6:30 atangin vantlang inkhawm a awm dawn a ni.