Chief Minister Zoramthanga’n Mizoram hmasawnna kalpui turin Myanmar ramah remna leh boruak muanawm tak a awm a tul tih sawiin, hemi atan hian India sorkar nen theihtawp chhuaha hmalak mek a nih thu a sawi.
He thu hi nimin zinga Khawzawl Dinthar Bazar-a amah lo lawmna a sawi a, chief minister chuan Myanmar ram buai avanga Mizoram chhunga raltlan thahnem tak awm mek leh ruihhlo tawlh rukna hluar chu Mizorama hmasawnna kawng zawh tura mu tan pakhat a nih thu sawiin, “He harsatna hi a fihlim thuai theihna turin theihtawp chhuahin tan kan la mek a, a tahtawlin a hlawhtling chho mek,” a ti.
Chief minister chuan Khawzawl chu khaw hmun rem tak, khawpui atan pawha chei thar zel phurawm tak a nih thu sawiin, tuna sorkarin kawng hrang hranga a hmalakna pawh chak zawka kalpui a nih theihna tura tan lak mek anih thu a sawi.
MNF president hian Mizo Hnam Rûn, Khawzawl Vengthara sak mek bakah Martar Thlan tlawhin, Martar-te zahna pangpar a dah nghal a ni.
Khawzawl DC Office sak mek leh Mualvawm Field-a hnathawh kal mek a tlawh bawk a. Khawzawl DC office sak hi chhawng li a ni dawn a, first floor, ground floor leh basement I hi 585.64 Sq.m-a zau niin basement II hi 362.34 sq.m-a zau a ni a, total floor area hi 2,119.26 sq.m a ni.
Khawzawla cham mek Dy. Chief Minister Tawnluia leh Aizawl South-III bialtu MLA Prof. Lalnunmawia, Horticulture Department Director Elizabeth Saipari leh thawktu dangte, Khawzawl DC leh Official dang ten Chief Minister hi an tawiawm bawk.